الماتىدا سالماعى 5 كەلىدەن اساتىن الىپ بالا دۇنيەگە كەلدى
نارەستە 4№ قالالىق پەرزەنتحاناسىندا ومىرگە كەلدى. سالماعى 5 كەلى 100 گرام نارەستەنى دارىگەرلەر كەسار تىلىگى ارقىلى بوساندىرىپ الۋى كەرەك ەدى.
«ايەلدىڭ قاعاناق سۋى كوپ بولدى، مۇنداي جاعدايدا ءوزى بوسانعاندا انا مەن بالا ءۇشىن بەلگىلى ءبىر قاۋىپ بولادى. قاعاناق سۋىنىڭ كوپتىگى كەزىندە اسقىنۋ بولسا، كىندىك ءتۇسۋى مۇمكىن. ال بۇل ءوز كەزەگىندە شۇعىل تۇردە كەسار تىلىگى ارقىلى بوساندىرۋعا اكەلەدى. ۋلترادىبىستىق زەرتتەۋ كەزىندە ىشتەگى نارەستەنىڭ سالماعى 4600-4800 بولادى دەپ بولجانعان. كەنەت تولعاق قىسىپ، قاراشانىڭ بىرىندە تاڭعى ساعات 5:30 دا تابيعي جولمەن دۇنيەگە قىز بالا كەلدى»، - دەيدى الماتى 4№ پەرزەنتحاناسىنىڭ اكۋشەر-گينەكولوگى اينۇر يمانقۇلوۆا.
قازىر ناتاليا ۇيگە شىعۋعا دايىندالىپ جاتىر. قىزىنا داريا دەگەن ەسىم بەردى. بۇل - ناتاليانىڭ وتباسىنداعى ءتورتىنشى بالا.
«38 جاستامىن، ۇلكەن قىزىم 11 دە، ۇلىم 9 جاستا، سودان كەيىن 2,7 جاسار تاعى ءبىر ۇلىم بار، مىنە، داريا دەگەن قىزىم دۇنيەگە كەلدى. داريا - سىيلىق دەگەن سوزدەن شىققان. قۇداي بىزگە ءتورت بالا سىيلادى. مەنىڭ ۇلكەن قىزىم دا ءىرى سالماقپەن دۇنيەگە كەلدى - 4,1 كەلى. داشا دا سولاي. قىزىمدى دۇنيەگە اكەلۋگە كومەكتەسكەن دارىگەرلەرگە راحمەت»، - دەيدى الماتىلىق كوپبالالى انا.
دارىگەرلەردىڭ ايتۋىنشا، ىشتەگى نارەستەنىڭ ۇلكەن بولۋى قازىر سيرەك كەزدەسەتىن جاعداي ەمەس.
4№ پەرزەنتحانادا جىل باسىنان بەرى سالماعى 4 كەلىدەن اساتىن 621 ءسابي دۇنيەگە كەلگەن.
ال سالماعى 5 كەلىدەن اساتىن 10 بالا تۋدى.
«ىشتە ءىرى نارەستەنىڭ دامۋ سەبەپتەرى: جۇكتى ايەلدە قانت ديابەتىنىڭ بولۋى، گەموليتيكالىق اۋرۋ - بۇل اۋرۋ بالا مەن ونىڭ اناسى اراسىندا رەزۋس قايشىلىعى ورىن العاندا بولادى. سونىمەن قاتار، تۇقىم قۋالاۋشىلىق تا بار»، - دەيدى دارىگەر.