نەسيەنى تەز جابۋدىڭ 5 نەگىزگى جولى. ەكونوميست كەڭەستەرى
8 ميلليونعا جۋىق قازاقستاندىقتىڭ قولدانىستاعى نەسيەلەرى بار. قارىزدان قالاي تەزىرەك قۇتىلۋعا بولادى؟ ونىڭ جولدارىن قارجىگەر ماقسات حالىق ءتۇسىندىرىپ بەردى.
قايتا ەسەپتەۋ
ماقسات حالىقتىڭ سوزىنشە، ەڭ الدىمەن، تۇتىنۋشىلىق قۇقىق تولىق ساقتالۋى كەرەك. كەز كەلگەن كليەنت ءوزى كەلىسىمگە وتىرعان ەكىنشى دەڭگەيلى بانكپەن شارتتى جاڭارتا الادى. ال بۇل ءوز كەزەگىندە نەسيەنى تەز جابۋعا كومەكتەسۋى مۇمكىن.
«بورىشكەر بولساڭىز دا، ءسىز بانكتىڭ كليەنتى بولىپ قالا بەرەسىز. بانككە ءوتىنىش جازىپ، قارىزدى قايتا ەسەپتەتۋگە بولادى. ياعني بۇعان دەيىن ايىنا 35 مىڭ تەڭگە تولەپ جۇرسەڭىز، قايتا ەسەپتەۋدەن كەيىن ول سومانى وسىرە الاسىز. ارينە، ول كەز كەلگەن ادامنىڭ قارجىلىق مۇمكىندىگىنە تىكەلەي بايلانىستى، ءبىراق كوپ جاعدايدا ارتىق اقشاسى بار ادامداردىڭ ءوزى كەلىسىمشارتتىڭ كەسىرىنەن شىعىنعا باتىپ جاتادى. ال ونى وزگەرتۋگە بولاتىنىن ەكىنىڭ ءبىرى بىلە بەرمەيدى»، - دەيدى ول.
قايتا قارجىلاندىرۋ
قايتا قارجىلاندىرۋ - نەسيە ساياساتىنىڭ ءادىسى، ەسكى بەرەشەكتى جاڭا مىندەتتەمەلەر قابىلداۋ جولىمەن وتەۋ. ەكونوميستەر بۇل ءادىستى نەسيەنى تەز جابۋ ءۇشىن تاپتىرماس قۇرال دەپ سانايدى.
«بۇل تەك ءبىر جاعدايدا دۇرىس بولادى. مىسالى، كەزىندە جوعارى پايىزبەن نەسيە الدىڭىز، ءبىراق كەلەسى جىلى ەلدەگى ەكونوميكالىق جاعداي تۇراقتالىپ، ينفلياتسيا قالىپقا كەلگەندە بازالىق مولشەرلەمە تۇسەدى، ياعني نەسيەنىڭ پايىزى تومەندەيدى. وسى ۋاقىتتا نەسيەنى قايتا قارجىلاندىرىپ، قارىزدىڭ ۇستىنەن تولەيتىن پايىزىن ازايتۋعا بولادى. قىسقاشا قايىرعاندا، نەسيە مولشەرلەمەسى ءسىز العان ۋاقىتتان قازىر تومەن بولىپ تۇرسا، وندا قايتا قارجىلاندىرۋعا بولادى. وسى رەتتە ەسكەرەتىن جايت بار: قايتا قارجىلاندىرۋ كەزىندە ۇستىنەن تاعى قاراجات الۋعا بولمايدى»، - دەدى قارجىگەر.
دەپوزيت اشۋ
ماقسات حالىق كوپ جاعدايدا دەپوزيتتى نەسيەسى بار ادامدار اشپايتىنىن ايتادى. ونىڭ پىكىرىنشە، بۇل قارجىلىق ساۋاتتىڭ تومەندىگىنەن.
«قازىر نەسيە الاتىن ەمەس، دەپوزيت اشاتىن ۋاقىت ەكەنىن ايتقىم كەلەدى. نەگە دەسەڭىز، بۇگىندە دەپوزيتتەردىڭ پايىزى ءوستى. ال تۇتىنۋشىلىق نەسيەلەردىڭ بازالىق مولشەرلەمەسى ەلدەگى ەكونوميكالىق احۋالعا بايلانىستى ءتيىمدى بولماي قالدى. نەسيەنى تەز جابۋ ءۇشىن دەپوزيت بولۋى كەرەك. تابىستىڭ كەمىندە 10 پايىزىن دەپوزيتكە قۇياتىن بولساڭىز، جىل سوڭىندا ونىڭ ۇستىنەن تۇسەتىن پايدا كەمىندە 14 پايىز بولادى. ال بۇل نەسيەنىڭ پايىزىن وتەۋگە كومەكتەسەدى. ءبىر سوزبەن ايتقاندا، دەپوزيتتەن تۇسكەن بونۋسپەن نەسيەنىڭ پايىزىن جابۋ كەرەك. سول كەزدە نەسيە دە تەز جابىلادى جانە شىعىنعا كوپ باتپايتىن بولاسىز»، - دەيدى ول.
كوشكىن ءادىسى
بۇل ءادىس كليەنتتىڭ بىرنەشە نەسيەسى بار بولعان جاعدايدا قولدانىلادى.
«ارينە، لوگيكاعا سالساق، سوماسى از نەسيەنى ءبىرىنشى جاپقان ءتيىمدى كورىنەدى، سەبەبى نەسيەنى تەز جابۋعا قوسىمشا موتيۆاتسيا پايدا بولادى. دەگەنمەن، ەڭ ءبىرىنشى نەگىزگى قارىزدى جابۋدى ويلاۋ كەرەك. ودان كەيىن عانا پايىزى جوعارى نەسيەنى تولىق وتەۋگە تىرىسۋ كەرەك. پايىزى جوعارى نەسيەنىڭ سوماسى از دا بولۋى مۇمكىن، كوپ تە بولۋى مۇمكىن، سوندىقتان بۇل تۇستا كەسىپ ايتۋ قيىن»، - دەدى مامان.
قوسىمشا تابىس
ماقسات حالىق نەسيە جابۋدا نەگىزگى تابىس كوزىن عانا قاراستىرۋعا بولمايتىنىن ايتتى.
«قوسىمشا تابىس كوزىن تابۋعا تىرىسۋ كەرەك. ول ءۇشىن قازىر كوپتەگەن مۇمكىندىك بار. قاشىقتان جۇمىس ىستەۋگە دە بولادى. ەڭ باستىسى، نەسيە سوماسىن جابا الاتىنداي قوسىمشا تابىس بولعانى ماڭىزدى. سول كەزدە نەگىزگى تابىستى دەپوزيتكە قۇيۋعا بولادى»، - دەپ ءسوزىن اياقتادى ول.
massaget.kz