قان قىسىمىن قالاي كوتەرۋگە بولادى: كومەگى تيەرى انىق 5 جىلدام ءتاسىل
جاقسى جاڭالىقتان باستايىق: تومەن قىسىم - جاقسى نارسە ەمەس، ءبىراق ودان كوبىنەسە قاۋىپ جوق. الايدا گيپوتونيا ۇستاماسىن ەلەمەي جۇرە بەرۋگە مۇلدەم بولمايدى.
قان قىسىمىنىڭ تومەن بولۋى دەگەن نە جانە ول نەسىمەن قاۋىپتى
شەكارالىق دەڭگەي - 90/60 ەكەنىن ەستە ۇستاڭىز. تونومەتر وسى ماندەردى كورسەتىپ تۇرسا نەمەسە وسى ماننەن ازداپ اۋىتقىپ تۇرسا، ءبارى دۇرىس دەگەن ءسوز. ءبىراق وسى ەكى ساننىڭ كەز كەلگەنى - ءبىرىنشىسى بولسىن، ەكىنشىسى بولسىن تومەندەپ كەتسە - قىسىمنىڭ ازايعانى تۋرالى ايتۋعا بولادى.
بۇندا ءبىر ازعانتاي ماڭىزدى ەرەكشەلىك بار. ەگەر جوعارى قىسىم بويىنشا انىق بولسا: ول بارىنە قاۋىپتى، تومەنگى ارتەريالىق قىسىم جاي عانا ءسىزدىڭ وزگەشەلىگىڭىز بولۋى مۇمكىن. ول ءسىزدى سىرقاتتاندىرا بەرمەسە، ونى دەنساۋلىقتاعى كىنارات دەپ سانامايدى جانە ونىمەن كۇرەسۋدىڭ قاجەتى جوق.
مىنانداي سيمپتومدار پايدا بولىپ جاتسا، ماسەلە باسقا:
- السىزدىك؛
- ەستەن تانىپ قالاردىڭ ءسال الدىنداعىداي كۇيگە تۇسىرەتىن باس اينالۋى؛
- كوزدىڭ بۇلدىراۋى؛
- جۇرەك اينۋى؛
- قالتىراۋ؛
- تەرشەڭدىك؛
- ەنجارلىق.
بۇل سيمپتومدار جيىنتىعى مازاڭدى الىپ، جۇمىس ىستەۋىڭە جانە ەلمەن ارالاسۋىڭا كەدەرگى كەلتىرەدى. ءبىراق ەڭ باستىسى: تومەنگى قىسىم جاعىمسىز سيمپتومدارمەن بىرگە جۇرسە، بۇل شىندىعىندا تەك سيمپتوم عانا.
ارتەريالدىق قان قىسىمىنىڭ تومەندەۋىنىڭ سەبەپتەرى ءارتۇرلى: جاي عانا ورگانيزمنىڭ سۋسىزدانۋى مەن سترەسستەن باستاپ گورمونالدىق بۇزىلىستارعا، ىشتەن قان كەتۋىنە جانە ميوكارد ينفاركتىنە دەيىن بولۋى مۇمكىن.
گيپوتونيانى قوزدىرىپ جاتقان نە ەكەنىن ناقتى انىقتاپ الىپ بارىپ، ەمدەلۋدى باستاۋدىڭ ماڭىزى جوعارى. نەگىزگى كەسەل ەمدەلگەن كەزدە قان قىسىمى ءوزى-اق قالپىنا تۇسەدى.
قاي كەزدە جەدەل جاردەمدى شاقىرۋ قاجەت
وزىڭىزدەن نەمەسە جاقىن ادامىڭىزدان اسا تومەندەپ كەتكەن قان قىسىمىن عانا ەمەس، سونداي-اق:
- تەرى سۋىق، جابىسقاق جانە بوزارىپ كەتكەن كەزدە؛
- جىلدام ءۇستىرتىن تىنىستاعان كەزدە؛
- تامىردىڭ ءالسىز جانە جىلدام بۇلكىلدەپ تۇرعان كەزىندە؛
- اقىل-ەستىڭ كىرەسىلى-شىعاسىلىعىن بايقاي سالا جەدەل جاردەمدى شاقىرۋ كەرەك.
بۇل جەدەل ارتەريالدىق گيپوتەنزيانىڭ (كوللاپستىڭ، شوكتىڭ) نىشاندارى. بۇنداي كۇي ءومىر ءۇشىن قاۋىپتى. ول مىيدىڭ جانە ىشكى اعزالاردىڭ گيپوكسياسىنا اپارىپ سوعۋى مۇمكىن. وسى سەبەپتى مەديتسينالىق كومەككە جۇگىنۋدى كەشەۋىلدەتۋگە بولمايدى.
ءۇي جاعدايىندا قان قىسىمىن قالاي تەز جوعارىلاتۋعا بولادى
ەسكە سالايىق: ەگەر تومەنگى قىسىمنىڭ جاعىمسىز سيمپتومدارى بەلگى بەرىپ تۇرسا، تەراپيەۆتكە بارىپ قارالىڭىز. ولاي ەتپەگەن جاعدايدا جاسىرىن ءارى اناعۇرلىم اۋىر كەسەلگە ۇشىراۋىڭىز مۇمكىن. ءبىراق، ءسىز دارىگەرگە جەتكەنشە نەمەسە مامان سىرقاتتانۋدىڭ سەبەپتەرىن انىقتاعانشا، قىسىمدى جوعارىلاتۋدىڭ ۇيدە ىستەۋگە بولاتىن قاراپايىم امالدارىن قولدانۋعا بولادى. وزىڭىزگە مىنا امالداردىڭ ەڭ جايلىسىن تاڭداپ الىڭىز نەمەسە ولاردى ۇيلەستىرىپ قولدانىڭىز.
1. تۇزدى ءبىر تاعامدى جەپ الىڭىز
مايشاباقتىڭ ءبىر ءتىلىمىن، تۇزدالعان قياردى، سۇزبە ىرىشىكتىڭ ءبىر-ەكى ءتىلىمىن، سويا تۇزدىعى مولىنان دەمدەلگەن ءبىر قاسىق كۇرىشتى جەڭىز.. .
ناتري حلوريدى (كادىمگى اس تۇزىنىڭ ءوزى) ارتەريالدىق قىسىمدى ارتتىرادى. ول كەيدە كۇرت جوعارىلاتىپ جىبەرەدى، سوندىقتان گيپەرتونياسى بار ادامدارعا ونى مۇلدەم قولدانۋعا بولمايدى. ءبىراق بىزدىكى مۇلدەم كەرىسىنشە جاعداي.
نازار اۋدارىڭىز! قان قىسىمىن تۇزدى تاعامدارمەن ۇنەمى جوعارىلاتىپ جۇرە بەرۋگە بولمايدى. ارتىق مولشەردەگى ناتريي ادام جۇرەگىن، اسىرەسە ەگدە تارتقان كىسى بولسا، السىرەتىپ جىبەرۋى مۇمكىن.
2. ءبىر ستاكان سۋ ءىشىپ الىڭىز
دۇرىسى، ىشە الساڭىز، ەكى ستاكان ءىشىپ جىبەرىڭىز. سۇيىقتىق قاننىڭ كولەمىن ارتتىرادى (ونىڭ سالدارىنان قاننىڭ تامىرعا تۇسەتىن قىسىمى ارتادى)، سونىمەن قاتار سۋسىزدانۋدى بولدىرمايدى.
3. كومپرەسسيالىق گولف نەمەسە شۇلىق كيىپ الىڭىز
يكەمدى شۇلىقتى قالىپتى جاعدايدا دومبىقكان جەردى نەمەسە ۆاريكوز بولعان تامىرلارداعى اۋىرسىنۋدى ازايتىپ باسۋ ءۇشىن كيەدى. ءبىراق، بۇعان قوسا، ول اياقتاعى قاننىڭ كولەمىن ازايتادى. ساۋمالانىپ شىعىپ كەتكەن قان نەگىزگى تامىرلارداعى قىسىمدى ارتتىرادى.
4. دۇرىس دەنە كۇيىن ۇستاڭىز
بۇل كومپرەسسيالىق شۇلىقتارعا وزىنشە ءبىر بالاما.
ەگەر وتىرساڭىز، ءبىر اياعىڭىزدى ەكىنشى اياعىڭىزعا ايقاستىرا قويىڭىز. وسىلايشا ءسىز اياقتاعى قان كولەمىن ازايتىپ، نەگىزگى تامىرلارداعى قان قىسىمىن ارتتىراسىز. ايتپاقشى، وسى سەبەپتى گيپەرتونياعا شالدىققاندارعا بۇنداي پوزادا وتىرۋعا بولمايدى.
ەگەردە تۇرەگەپ تۇرساڭىز، ەكى سانىڭىزدى قايشىعا ۇقساتىپ ايقاستىرىپ، ولاردى قاتتى قىسۋىڭىزعا بولادى. بۇنىڭ اسەرى دە الدىڭعىسىنا شامالاس بولادى.
تاعى ءبىر جولى بار: ءبىر اياعىڭىزدى ورىندىققا نەمەسە ساكىگە قويىڭىز دا، بۇكىل دەنەڭىزبەن بارىنشا العا ەڭكەيىڭىز.
5. كوفە ءىشىپ الىڭىز
بۇل قان قىسىمى دەڭگەيىن جوعارىلاتۋدىڭ ەڭ كوپ قولدانىلاتىن، ءبىراق پارمەندى بولۋى ەكىتالاي تاسىلدەردىڭ ءبىرى. كوفەين شىنىمەن- اق كوفەنى ءىشۋى سيرەك ادامداردىڭ ارتەريالىق قىسىمىن جوعارىلاتىپ جىبەرۋى مۇمكىن. ال ول ادام كوفەمان بولاتىن بولسا، كەرەكتى اسەر مىندەتتى تۇردە بولا قويمايدى.
قالاي ءدارى-دارمەكسىز قان قىسىمىن ۇزاق ۋاقىتقا جوعارىلاتىپ الۋعا بولادى
قايتالاپ وتەيىك: حال-احۋالىڭىزدىڭ سەبەپتەرىن ايقىنداعان دارىگەر ەمدەۋ جوباسىن جاساعانى ءجون. سيمپتومداردى باسەڭدەتۋ ءۇشىن مەديك تومەن قان قىسىمىن قالىپقا تۇسىرەتىن دارىلەردى جازىپ بەرەدى.
الايدا، ءسىز، ءومىر سالتىڭىزدى از-كەم وزگەرتىپ، ورگانيزىمىڭىزگە كومەكتەسە الاسىز. گيپوتونيا كەزىندە دارىگەرلەر بىلاي ىستەۋگە كەڭەس بەرەدى:
1. كوبىرەك، اسىرەسە كۇن ىستىق كەزدە جانە تەمپەراتۋراڭىز بولسا، سۋ ءىشىپ تۇرىڭىز.
2. الكگولدىك ىشىمدىكتەردى تۇتىنۋدى ازايتىڭىز. مۇمكىندىگىنشە سپيرتتىك ىشىمدىكتەردەن مۇلدەم تىيىلعانىڭىز ابزال.
3. جۇيەلى تۇردە جاتتىعىپ تۇرىڭىز نەمەسە، ەڭ قۇرىعاندا، كوبىرەك سەرۋەندەپ تۇرىڭىز: فيزيكالىق كۇش تۇسكەندە تامىرلاردىڭ تونۋسى جاقسارادى.
4. ءبىر ورىندا ۇزاق تۇرا بەرمەۋگە تىرىسىڭىز. ەگەر تۇرەگەپ تۇرىپ ىستەيتىن جۇمىستا جۇرسەڭىز، جيىرەك بوي جازىپ تۇرىڭىز: وتىرىپ-تۇرىڭىز، سەكىرەكتەڭىز، بيلەڭىز.
5. ىستىق ۆاننادا ۇزاق ۋاقىت جاتىپ الماڭىز. دەنساۋلىققا پايدالىراق ءتۇرى - كونتراستتى (ىستىق سۋ مەن سۋىق سۋ كەزەك- كەزەك اعىزىلاتىن) دۋشقا ءتۇسۋ.
6. كۇندەلىكتى راتسيونىڭىزداعى كومىرتەكتەردىڭ مولشەرىن ازايتىڭىز. ءتاتتى جەگىڭىز كەلىپ بارا جاتسا، جەمىس- جيدەك جەڭىز.
7. كىشىگىرىم پورتسيادان كۇنىنە 4- 5 رەت تاماقتانىپ تۇرىڭىز.