ەلوردادا «كۇلتەگىن» انيماتسيالىق فيلمىن 5 مىڭعا جۋىق بالا تەگىن تاماشالادى

نۇر- سۇلتان. قازاقپارات - ق ر مادەنيەت جانە سپورت مينيسترلىگى «قازاق كونسەرت» مەملەكەتتىك كونسەرتتىك ۇيىمى «كۇلتەگىن» مۋلتفيلمىنىڭ قايىرىمدىلىق كورسەتىلىمىن ۇيىمداستىردى، دەپ حابارلايدى قازاقپارات ءتىلشىسى.

بۇل قايىرىمدىلىق باستاما ناۋرىز مەرەكەسىنەن باستاۋ الدى. «كۇلتەگىن» مۋلتفيلمنىڭ 2 سەانسىنا  5000-عا جۋىق بالا، ونىڭ ىشىندە كوپبالالى جانە الەۋمەتتىك تۇرعىدان از قامتىلعان وتباسىلاردان شىققان بالالار، جەتىمدەر ءۇيىنىڭ تاربيەلەنۋشىلەرى، مۇگەدەك بالالار دا قاتىستى.

«بۇل قايىرىمدىلىق ءىس- شارا وتاندىق مۋلتفيلمدەر ارقىلى جاس كورەرمەننىڭ ەل تاريحىنا دەگەن قىزىعۋشىلىعىن ارتتىرادى. وتاندىق انيماتسيالىق تۋىندىلاردى كورسەتۋدەگى ماقسات - داڭقتى باتىرلاردىڭ ەرلىگىن، قازاق حالقىنىڭ مادەنيەتىن انيماتسيا ارقىلى تانىتۋ، سونداي- اق جاس ۇرپاقتى وتانسۇيگىشتىككە باۋلۋ. الداعى ۋاقىتتا «قازاق كونسەرت» پەن «قازاقفيلم» ۇيىمدارىنىڭ بىرلەسكەن باستاماسى ءوز جالعاسىن تاۋىپ، «قازاقستان» و ك ز كينوزالىندا مۋلتفيلمدەر جانە قازاق كينو ونەرىنىڭ باسقا دا وزىق تۋىندىلارى جاس بۇلدىرشىندەرگە تەگىن كورسەتىلمەك»، - دەپ حابارلايدى مينيسترلىكتەن.

تۇرىك قاعاناتىنىڭ داڭقتى اسكەري قولباسشىسى كۇلتەگىننىڭ ەرلىگى تۋرالى باياندايتىن بۇل مۋلتفيلمدى ق ر مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاق فيلم» ا ق تۇسىرگەن. قازاق جانە ورىس تىلدەرىندە كورسەتىلگەن «كۇلتەگىن» مۋلتفيلمى كىشكەنتاي بۇلدىرشىندەردىڭ كوڭىلىنەن شىعىپ وتىر. اتا- انالار دا يگى ءىس- شارانىڭ ۇيىمداستىرۋشىلارىنا ءوز العىستارىن جەتكىزدى.

«ايالا» قايىرىمدىلىق قورى ق ر مادەنيەت جانە سپورت مينيسترلىگى ۇيىمداستىراتىن كوپتەگەن مادەني ءىس- شارالارعا ءجيى قاتىسادى. بۇگىن «كۇلتەگىن» مۋلتفيلمىنىڭ قايىرىمدىلىق كورسەتىلىمىن نۇر- سۇلتان قالاسىنىڭ «بالالار ءۇيى» م ك م تاربيەلەنۋشىلەرى تاماشالادى. بۇعان دەيىن كورسەتىلگەن «مۇزبالاق» مۋلتفيلمىنە ارنايى مەكتەپ- ينتەرناتتاردىڭ 200 گە جۋىق وقۋشىسى قاتىستى. وسىنداي باستامالاردى ءبىز ءاردايىم قولداۋعا دايىنبىز. اتا- انا قامقورلىعىنسىز قالعان بۇلدىرشىندەرگە كوڭىل ءبولىپ، وسىنداي قىزىقتى ءارى تانىمدىق تۋىندىنى كورۋگە شاقىرعان ۇيىمداستىرۋشىلارعا العىسىمىز شەكسىز»، - دەيدى «ايالا» قايىرىمدىلىق قورىنىڭ نۇر- سۇلتان قالاسىنداعى وكىلى سالتانات اسكەربەك قىزى.

 ەسكە سالساق، 22 جانە 24 - ناۋرىز كۇندەرى ەلورداداعى QAZAQSTAN ورتالىق كونسەرت زالىندا «مۇزبالاق» انيماتسيالىق فيلمىن  5600 ءبۇلدىرشىن تاماشالاعان بولاتىن.

اۆتور: ايان بەكەن ۇلى