قازاقستان اۋىر اتلەتيكا فەدەراتسياسىنان حابارلاعانداي، بۇگىن سپورتشىلارىمىز ەكى التىن مەدالمەن جارىس كۇنىن اياقتاعان.
«81 كەلىگە دەيىنگى سالماقتا ونەر كورسەتكەن ولگا پاستۋحوۆا قوسسايىس بويىنشا 215 كەلى سالماقتى باعىندىرىپ (92 كەلى جۇلقي كوتەرۋدە جانە 123 كەلى سەرپە كوتەرۋدە) التىن مەدال يەلەندى. سونىمەن بىرگە، قازاقستاندىق اۋىر اتلەتتەردىڭ ونەرىن راحات بەكبولات كەرەمەت اياقتادى. 96 كەلىگە دەيىنگى سالماقتا ونەر كورسەتكەن ول قوسسايىستا 323 كەلى سالماقتى كوتەرىپ (144 كەلى جۇلقي كوتەرۋدە جانە 179 كەلى سەرپە كوتەرۋدە) ءبىرىنشى ورىنعا يە بولدى»، - دەلىنگەن حابارلامادا.
ەسكە سالا كەتسەك، قازىرگى ۋاقىتتا لاس-ۆەگاستا اۋىر اتلەتيكادان جاس وسپىرىمدەر اراسىنداعى الەم چەمپيوناتى ءوتىپ جاتىر. دودادا ەل نامىسىن بەس سپورتشى قورعادى.
چەمپيوناتتاعى العاشقى مەدالدى قازاقستان قۇراماسىنىڭ قورجىنىنا 16 جاستاعى سپورتشى سايرامكەز اقمولدا سالعان ەدى. الماتى وبلىسىنىڭ تۋماسى 61 كەلىگە دەيىنگى سالماق ساناتىندا التىن جۇلدە جەڭىپ الدى.
ودان سوڭ قازاقستان اۋىر اتلەتيكا فەدەراتسياسى سايىستىڭ ەكىنشى كۇنى 67 كەلىگە دەيىنگى سايحان تايسۋيەۆ قوسسايىستا 288 كەلى كوتەرگەنىن (127 كەلى جۇلقا كوتەرۋدە جانە 161 كەلى سەرپە كوتەرۋدە) حابارلادى.
الەم چەمپيوناتىندا قازاقستاندىق اۋىر اتلەت ءساپي ەسەنگەلدى ۇلتتىق كوماندا قورجىنىنا تاعى ءبىر التىن مەدال سالعان بولاتىن.