«بۇگىندە قىتاي قازاقستاننىڭ ءىرى سىرتقى ساۋدا سەرىكتەسى سانالادى. وتكەن جىلى ءوزارا تاۋار اينالىمىنىڭ كولەمى 11 ميلليارد دوللارعا جۋىقتادى. دەگەنمەن، قىتايلىق ستاتيستيكاعا سايكەس - 18 ميلليارد دوللار. قالاي دەسەك تە، كەز كەلگەن سان جاقسى. سەبەبى بۇل 30 پايىزدان استامعا ءوسىمدى قۇرايدى»، - دەپ اتاپ ءوتتى قازاقستان پرەزيدەنتى.
مەملەكەت باسشىسى قازاقستان مەن قىتاي ىنتىماقتاستىعىن دامىتۋ ءۇشىن مۇنان ارى دا الەۋەتتىڭ جەتكىلىكتى ەكەنىن باسا ايتتى.
«ءبىرىنشى توقساننىڭ وزىندە عانا تاۋار اينالىمى 2,5 ميلليارد دوللاردى قۇراپ، ءوسىم 16 پايىزعا جەتتى. قىتايدىڭ ە ا ە و- مەن قول قويعان كەلىسىمى مۇنان دا ۇلكەن مۇمكىنشىلىك بەرەدى. ءبىزدىڭ تابىستى ىنتىماقتاستىعىمىز ءسىز 2013 -جىلدىڭ 7 - قىركۇيەگىندە استاناداعى ءبىزدىڭ حالىقارالىق ۋنيۆەرسيتەتىمىزدىڭ قابىرعاسىندا العاش رەت جاريا ەتكەن «جىبەك جولى» ەكونوميكالىق بەلدەۋىن قۇرۋ باستاماڭىزدى جۇزەگە اسىرۋ اياسىندا ودان ارى نىعايا ءتۇستى. اعىمداعى جىلى وعان 5 جىل وتەدى. وسىعان بايلانىستى بۇل داتانى تەلەكوپىر ارقىلى ءوزارا فورۋممەن اتاپ وتكەن ءجون سياقتى»، - دەدى نۇرسۇلتان نازاربايەۆ.
ايتا كەتەيىك، ەلباسى نۇرسۇلتان نازاربايەۆ قىتايعا مەملەكەتتىك ساپارى اياسىندا 10 - ماۋسىم كۇنى چيڭداۋ قالاسىندا وتەتىن شاڭحاي ىنتىماقتاستىق ۇيىمىنا مۇشە مەملەكەتتەر باسشىلارىنىڭ كەڭەسىنە قاتىسادى دەپ كۇتىلۋدە.
اۆتور: مارلان جيەمباي