ۆەتنامعا ەلىمىزدەن 5 مىڭ توننا بيداي ەكسپورتتالدى

استانا. قازاقپارات - قازاقستان استىعى وڭتۇستىك- شىعىس ازيا ەلدەرىنە تاسىمالدانىپ جاتىر.

 ماسەلەن، جىل باسىنان بەرى ۆەتنامعا 5 مىڭ توننا بيداي جەتكىزىلدى. بۇل تۋرالى تىلشىمىزگە سۇحبات بەرگەن ليانيۋنگان قازاق- قىتاي حالىقارالىق لوگيستيكالىق كومپانيانىڭ باس ديرەكتورى ليۋ بين ايتتى.

 «بۇل قازاقستاندىق ءونىمنىڭ تەڭىز ارقىلى قالىپتى تاسىمال اينالىمىنا تۇسكەنىن بىلدىرەدى»، - دەيدى. ليۋ بين الداعى ۋاقىتتا قورعاس جانە الاشانكوۋ كەدەندەرىنىڭ جۇك وتكىزۋ قۋاتىن ارتتىرىپ، قىتاي - ەۋروپا باعىتىنداعى تاسىمالعا سەرپىن بەرۋ جوسپارلانىپ وتىرعانىن ايتتى. وسىلايشا ىشكى قۇرلىقتا جاتقان ەلىمىزدىڭ ەكسپورتى تەك كورشى مەملەكەتتەرمەن شەكتەلمەي، الەمنىڭ كەز كەلگەن بۇرىشىنا ءوز ءونىمىن جەتكىزە الاتىن مۇمكىندىككە يە بولىپ وتىر.

قازاقستان ليانيۋنگان تەڭىز پورتى ارقىلى جىل سايىن 150 مىڭ كونتەينەر جۇك وتكىزە الادى. 2020 -جىلعا قاراي كونتەينەر سانى 500 مىڭعا جەتەدى. ليانيۋنگان قالاسىنداعى قازاق- قىتاي لوگيستيكالىق تەرمينال 2014 -جىلى پرەزيدەنت نۇرسۇلتان نازاربايەۆتىڭ باستاماسىمەن قۇرىلعان.

ليۋ بين، ليانيۋنگان قازاق- قىتاي حالىقارالىق لوگيستيكالىق كومپانيانىڭ باس ديرەكتورى:

- قازاقستان استىعى تيەلگەن كونتەينەرلەردى جاقىندا عانا ۆەتنامعا وتكىزدىك. بۇل جۇمىس ارى قاراي دا جالعاسا بەرەدى. قازاقستاننان تاسىمالداناتىن ونىمدەردىڭ كولەمى مەن تۇرلەرىن ارتتىرۋدى جوسپارلاپ وتىرمىز. تەك بيداي عانا ەمەس، سونىمەن قاتار سيىر جانە تاۋىق ەتتەرىن وڭتۇستىك- شىعىس ازيا ەلدەرىنە، ال كەرى باعىتتا جەمىس- جيدەكتەر تاسىمالداۋ ارقىلى لوگيستيكالىق اينالىم جاساي الامىز. سوندا تاسىمال قۇنى ارزاندايدى، سول ارقىلى ءونىم باعاسى دا قىمبات بولمايدى.

http://24.kz/kz