قىزىلوردادا ورتالىق ازيانىڭ 5 مەملەكەتىنىڭ قاتىسۋىمەن ارال ماسەلەسىنە ارنالعان حالىقارالىق فورۋم وتەدى
بۇل تۋرالى وبلىس اكىمىنىڭ ورىنباسارى سەرىك قوجانيازوۆ پەن ارالدى قۇتقارۋ حالىقارالىق قورىنىڭ قازاقستانداعى اتقارۋشى ديرەكتورى بولات قابىكەن ۇلىنىڭ قاتىسۋىمەن وتكەن باسپا ءسوز ءماسليحاتىندا ءمالىم بولدى.
بۇل تۋرالى قازاقپارات ءتىلشىسى حابارلادى. فورۋمعا ورتالىق ازيانىڭ 5 مەملەكەتى مەن باسقا دا حالىقارالىق ۇيىم وكىلدەرى قاتىسادى.
ماقسات - ارال ماسەلەسىنە قوعام نازارىن اۋدارۋ، ايماقتىڭ الەۋمەتتىك-ەكونوميكالىق دامۋىن ىلگەرىلەتەتىن جوبالاردى ناقتىلاپ، ءوڭىردىڭ ەكولوگيالىق احۋالىن جاقسارتۋ جولدارىن تالقىلاۋ.
فورۋمنىڭ ءبىرىنشى كۇنى باياندامالار تىڭدالسا، ەكىنشى كۇنى دەلەگاتتار ارالدى تىكۇشاقپەن باعدارلاپ، تەڭىز تىنىسىمەن تانىسادى.
باس قوسۋ اياسىندا بىرنەشە جوبالاردىڭ تانىستىرىلىمى وتەدى. اتاپ ايتقاندا، قامباش كولىندە عىلىمي-تۋريستىك ورتالىق اشۋ، سونداي-اق، ارالدىڭ شىعىس بولىگىندەگى تەڭىز ۇلتانىنا اعاش وتىرعىزىپ، جاسىل بەلدەۋ جاساۋ جانە ءۇشىنشى جوبا - كيىك تارالىمىن كوبەيتۋگە ارنالعان پيتومنيكتى ىسكە قوسۋ جوبالارى كوپشىلىك نازارىنا ۇسىنىلادى.
اۆتور: ەلۋباي اۋەزوۆ