ارحەولوگتار 5 قارۋىمەن جەرلەنگەن ساربازداردى تاپتى - اقتوبە وبلىسى - فوتو

استانا. قازاقپارات - بيىلعى دالالىق ماۋسىمدا قازاقستان رەسپۋبليكاسى ۇلتتىق مۋزەيىنىڭ «حالىق قازىناسى» عىلىمي-زەرتتەۋ ينستيتۋتى ەلىمىز بويىنشا ءار تاريحي كەزەڭدەردى قامتيتىن وننان استام نىساندا ارحەولوگيالىق زەرتتەۋ جۇمىستارىن جۇرگىزۋدە.

كەزەكتى زەرتتەۋلەردىڭ ءبىرى - اقتوبە وبلىسىنىڭ قوبدا اۋدانىندا ورنالاسقان ج. س. د. VI- V ع ع. جاتاتىن ءتورتوبا جەرلەۋ-عۇرىپتىق كەشەنىندە جالعاستى، دەپ جازادى e-history.kz.

بۇل كەشەندەگى بيىلعى اتقارىلعان جۇمىستار مەن الىنعان ماعلۇماتتار تۋرالى ەكسپەديتسيا جەتەكشىسى، تاريح عىلىمدارىنىڭ كانديداتى اقان وڭعار ۇلى قىسقاشا باياندايدى.

«ساۆروماتتىق جەرگىلىكتى بيلىك اۋلەتى وكىلىنىڭ قۇرمەتىنە سالىنعان ءتورتوبا جەرلەۋ- عۇرىپتىق كەشەنىندەگى زەرتتەۋ جۇمىستارى 2011 -جىلدان باستالعان-دى.

بەس جىلدىق كەشەندى زەرتتەۋلەر بارىسىندا ەسكەرتكىشتىڭ اينالاسىنان ءار تاريحي كەزەڭنىڭ 7 جەرلەۋ ورنى مەن 2 عۇرىپتىق راسىمدەر اتقارعان نىساندار زەرتتەلىندى.

ءىرى ارحيتەكتۋرالىق ەسكەرتكىش سانالاتىن ديامەترى 50 م، بيىكتىگى 4,7 م توپىراق ءۇيىندىلى وبادا قۇرىلىستىڭ سالىنۋ كەزەڭدەرىن انىقتاۋعا بايلانىستى قازبا جۇمىستارىن جۇرگىزۋ بارىسىندا بيىل ەكى جاۋىنگەردىڭ تونالماعان جەرلەۋ ورنى اشىلدى. بۇل قابىرلەر نەگىزگى ەسكەرتكىش تۇرعىزىلعاننان بىرنەشە ءجۇز جىلدان كەيىن جاسالىنعان.

«ەر قۋاتى - قارۋى» دەگەندەي، ەكى جاۋىنگەر اتۋ قارۋى - وققا تولى قورامساقتى ساداقپەن (ساداقتىڭ تەك ءىزى ساقتالىنعان)، تۇيرەۋ قارۋى - تەمىر ۇشتى نايزاسىمەن جانە قىلىش، قانجارىمەن بىرگە جەرلەنگەن. وبا ءۇيىندىسىنىڭ ورتاسىنداعى نەگىزگى ءقابىر شۇڭقىرىنىڭ شەتىنە قويىلعان ءۇشىنشى جاۋىنگەردىڭ قورامساعىنان 184 قولا جەبە تابىلدى»، - دەيدى ا. وڭعار ۇلى.