الماتىدا يندۋستريالىق جوبالاردى جۇزەگە اسىرۋ اياسىندا 5 مىڭداي جاڭا جۇمىس ورنى اشىلادى - ب. بايبەك

الماتى. قازاقپارات - بۇگىن الماتى قالاسى اكىمدىگىندە قالا باسشىسى باۋىرجان بايبەكتىڭ توراعالىعىمەن ىسكەرلىك كەڭەسى ءوتتى. وعان ق ر ينۆەستيتسيالار جانە دامۋ ءمينيسترى اسەت يسەكەشيەۆ، مەملەكەتتىك قۇرىلىمداردىڭ جانە بيزنەس وكىلدەرى قاتىستى.

ءوز سوزىندە قالا باسشىسى الەمدە قالىپتاسىپ وتىرعان داعدارىس اياسىندا قالا ەكونوميكاسىن جاڭا دەڭگەيگە كوتەرۋ كەرەكتىگىن ايتتى.

«جاڭا جاعدايدا ءبىرىنشى كەزەكتە الماتى قالاسىنىڭ حالىقارالىق اۋەجايىن دامىتۋ قاجەت بولادى. شەت ەلدەن كەلگەن قوناقتار ەلىمىزدى ءبىرىنشى وسى اۋەجاي ارقىلى تانيدى. سونىمەن قاتار، كولىك- لوگيستيكالىق توراپتى حالىقارالىق دەڭگەيگە كوتەرۋىمىز كەرەك. ويتكەنى ول - الماتىنىڭ بولاشاعى»، - دەدى شاھار باسشىسى.

سونىمەن قاتار، قالا باسشىسى الداعى ۋاقىتتا الماتىدا يندۋستريالدىق جوبالاردى جۇزەگە اسىرۋ اياسىندا 5 مىڭداي جۇمىس ورنى اشىلاتىندىعىن ايتتى.

«وسىدان ەكى كۇن بۇرىن اكىمدىكتە وتكەن وڭىرلىك ۇيلەستىرۋ كەڭەسىندە 22 يندۋستريالدىق جوبا ماقۇلداندى. ولار ەلىمىزدىڭ يندۋستريالاندىرۋ كارتاسىنا ەنگىزىلدى. ەندى بۇل، الداعى ۋاقىتتا قالادا 5 مىڭداي جۇمىس ورنىن اشۋعا مۇمكىندىك بەرەدى. اتالعان جوبالاردىڭ جۇزەگە اسىرۋعا 62,6 ميلليارد تەڭگە جۇمسالادى. جالپى، الماتىنىڭ الەۋەتى وتە جوعارى. الماتى - جاستاردىڭ قالاسى. قازاقستاندا يننوۆاتورلاردىڭ 87 پايىزى الماتىدا تۇرادى. قالامىزدا نارىقتىڭ 35 پايىزىن ساۋدا سالاسى قۇرايدى. سوندىقتان، الماتىدا ەكونوميكانىڭ بارلىق سالاسىن دامىتۋ ءۇشىن ەڭ باستىسى قولايلى ينۆەستيتسيالىق كليماتتى بارىنشا نىعايتا ءتۇسۋىمىز كەرەك»، - دەدى ب. بايبەك.