الەمدىك جانە ءداستۇرلى دىندەر ليدەرلەرىنىڭ 5- سەزىنە قاتىسۋشىلاردىڭ دەكلاراتسياسى
بۇگىن رەسمي ب ا ق-تا الەمدىك جانە ءداستۇرلى دىندەر ليدەرلەرىنىڭ V سەزىنە قاتىسۋشىلاردىڭ دەكلاراتسياسى جاريالاندى.
قازاقپارات قۇجاتتىڭ تولىق ءماتىنىن تاراتادى.
***
ءبىز، ادامزاتتىڭ جارقىن بولاشاعى ءۇشىن بەيبىتشىلىككە، كەلىسىم مەن جاسامپاز ىنتىماقتاستىققا ۇمتىلىسپەن باس قوسقان، الەمدىك جانە ءداستۇرلى دىندەر ليدەرلەرىنىڭ V سەزىنە قاتىسۋشىلار،
قازاقستان رەسپۋبليكاسىنىڭ پرەزيدەنتى جوعارى مارتەبەلى نۇرسۇلتان نازاربايەۆ مىرزاعا الەمدىك جانە ءداستۇرلى دىندەر ليدەرلەرىنىڭ سەزىن وتكىزۋ جونىندەگى يگى باستاماسى ءۇشىن، بارشا قازاقستان حالقى مەن ونىڭ ۇكىمەتىنە كەڭپەيىلدىك ءارى قوناقجايلىق تانىتقانى ءۇشىن العىسىمىزدى بىلدىرە وتىرىپ،
XXI عاسىردا ءادىل ءارى قاۋىپسىز الەمگە قول جەتكىزۋ ءۇشىن ءدىنارالىق جانە وركەنيەتارالىق ءۇنقاتىسۋدى ىلگەرىلەتۋدەگى سەزدىڭ جوعارى ءرولىن جانە قازاقستان رەسپۋبليكاسىنىڭ قوسقان ۇلەسىن مويىنداي وتىرىپ،
ءدىنارالىق جانە مادەنيەتارالىق ۇيلەسىمدىكتى كوتەرمەلەۋ، ءدىن ليدەرلەرى مەن ساياسي قايراتكەرلەر اراسىنداعى ءۇنقاتىسۋدى نىعايتۋ جونىندەگى جاھاندىق جانە وڭىرلىك باستامالاردى قولداي وتىرىپ،
الەمدىك جانە ءداستۇرلى دىندەردىڭ رۋحاني مۇراتتار مەن قۇندىلىقتاردى بەكەمدەۋ ارقىلى ادامزات وركەنيەتىن دامىتۋعا قوساتىن ۇلەسىن اتاپ كورسەتە وتىرىپ،
ءوزارا قۇرمەت احۋالىن قالىپتاستىرۋداعى، وتباسىلىق قۇندىلىقتاردى نىعايتۋداعى جانە جاس بۋىندى يماندىلىققا تاربيەلەۋدەگى ءدىننىڭ ماڭىزدى ءرولىن سەزىنە وتىرىپ،
ءدىنارالىق جانە ەتنوسارالىق شيەلەنىستىڭ وسۋىنە، ساياسي تۇراقسىزدىققا جانە الەمنىڭ ءتۇرلى وڭىرلەرىندەگى اسكەري قاقتىعىستارعا الاڭداۋشىلىق تانىتا وتىرىپ،
بەيبىت حالىقتىڭ قۇربان بولۋىنا جانە زارداپ شەگۋىنە اكەلىپ سوققان توزبەۋشىلىكتىڭ بارلىق ءتۇرىن، ونىڭ ىشىندە ءدىني توزبەۋشىلىك پەن راديكاليزم كورىنىستەرىن سىنعا الا وتىرىپ،
بارلىق دىندەردىڭ شىنايى قىزمەتىنە ەكسترەميزم مەن تەرروريزمنىڭ ەشقانداي قاتىسى جوق ەكەندىگىن باسا ايتا وتىرىپ،
V سەزدىڭ «ءدىن ليدەرلەرى مەن ساياسي قايراتكەرلەردىڭ بەيبىتشىلىك پەن دامۋ جولىنداعى ءۇنقاتىسۋى» اتتى نەگىزگى تاقىرىبىنىڭ اياسىندا قول جەتكىزىلگەن ۋاعدالاستىقتاردى ىسكە اسىرۋعا ۇمتىلىسىن راستاي وتىرىپ، تومەندەگىلەر تۋرالى ۋاعدالاستى:
- ءدىن ليدەرلەرىنىڭ ساياسي قايراتكەرلەرمەن، حالىقارالىق ۇيىمدارمەن جانە ازاماتتىق قوعاممەن تۇراقتىلىق پەن قاۋىپسىزدىكتى قامتاماسىز ەتۋ، جانجالداردى بولدىرماۋ جانە رەتتەۋ ماقساتىنداعى ءۇنقاتىسۋىنا جاردەم ەتۋگە؛
- اسكەري جانجالدار تاراپتارىن قاقتىعىستاردى توقتاتۋعا، بىتىمگە كەلۋگە جانە كەلىسسوزدەر ارقىلى زورلىق- زومبىلىققا جول بەرمەۋگە، بەيبىت ازاماتتاردى قورعاۋعا، بارلىق قايشىلىقتاردى بەيبىت جولمەن شەشۋگە شاقىرۋعا؛
- ۇلتتىق دەڭگەيدە دە، مەملەكەتارالىق دەڭگەيدە دە كەز كەلگەن ساياسي جانە ءدىني قايشىلىقتاردى كۇشپەن شەشۋ ادىسىنەن تۇبەگەيلى باس تارتۋعا؛
- بارلىق الدىڭعى قاتارلى الىپ مەملەكەتتەردىڭ ساياسي ليدەرلەرىن قازىرگى الەمدەگى سەنىمسىزدىك تۇڭعيىعىنىڭ تەرەڭدەۋىن توقتاتۋعا، ءبىر- بىرىنە سانكتسيا قولدانۋدى دوعارۋعا جانە بەيبىتشىلىك پەن قاۋىپسىزدىكتى ورناتۋ ماقساتىندا حالىقارالىق قۇقىققا سايكەس بىرىككەن ۇلتتار ۇيىمى مەن باسقا دا حالىقارالىق ۇيىمداردىڭ تەتىكتەرىن قايشىلىقتاردى رەتتەۋگە پايدالانۋ ءۇشىن شاقىرۋعا؛
- ءدىني جانە ساياسي ليدەرلەردىڭ تەڭدىك، ادىلدىك، ءوزارا قۇرمەت جانە بەيبىتقاتار ءومىر ءسۇرۋ قاعيداتتارىنا نەگىزدەلگەن ءۇنقاتىسۋىنا ىقپال ەتۋگە؛
- تۇراقتى بەيبىتشىلىك پەن دامۋ جولىندا رۋحاني جانە ساياسي ليدەرلەر اراسىنداعى ءوزارا ءىس- قيمىلدىڭ ءداستۇرلى تەتىكتەرىنىڭ قىزمەتىن جانداندىرىپ، جاڭا تەتىكتەر ىزدەستىرۋگە؛
- ادامنىڭ ار- وجدان، پىكىر، ءسوز جانە تاڭداۋ بوستاندىعىنا قۇقىقتارىنىڭ اجىراماستىعىن تۇسىنە وتىرىپ، الەمدىك جانە ءداستۇرلى دىندەرگە، ولاردىڭ كيەلى دەپ سانالاتىن بارلىق دۇنيەلەرىنە جانە ءدىندى ۇستانۋشىلاردىڭ ءدىني سەزىمدەرىنە تەڭ قۇرمەتپەن قاراۋدى قامتاماسىز ەتۋگە؛
- الەمدىك جانە ءداستۇرلى دىندەر اراسىنداعى ءۇنقاتىسۋدى ىلگەرىلەتۋ كەزىندە ءدىني الۋاندىلىقتى قۇرمەتتەۋگە؛
- جالعان ءدىني ريتوريكانى جامىلىپ، ارازدىقتى، وشپەندىلىك پەن زورلىق- زومبىلىقتى تۇتاندىرۋعا باعىتتالعان ارانداتۋلار مەن ارەكەتتەرگە قارسى تۇرۋعا؛
- تەرروريزم مەن ەكسترەميزمنىڭ تامىرىنا بالتا شابۋعا ۇمتىلا وتىرىپ، ولارعا قارسى ءىس- قيمىل جاساۋعا، تەرروريزم مەن ەكسترەميزمگە قارسى كۇرەستىڭ دىندەرگە جانە ءدىندى ۇستانۋشىلارعا قارسى باعىتتالعان سوعىسقا اينالىپ كەتپەۋى ءۇشىن ەرەكشە قىراعىلىق تانىتۋعا؛
- بەيبىتشىلىك پەن دامۋ جولىنداعى جاھاندىق ديالوگتى نىعايتۋ ماقساتىندا الەمدىك جانە ءداستۇرلى دىندەر ليدەرلەرى سەزىنىڭ بىرىككەن ۇلتتار ۇيىمىمەن، قاۋىپسىزدىك جانە ىنتىماقتاستىق سالاسىنداعى حالىقارالىق ۇيىمدارمەن جانە باسقا دا باستامالارمەن ءوزارا ءىس- قيمىلىن ودان ءارى دامىتۋعا؛
- ءدىني اعارتۋ ءىسىنىڭ، باسقا دىندەردى قۇرمەتتەۋگە تاربيەلەۋدىڭ، وتباسىلىق قۇندىلىقتاردى قادىرلەۋدىڭ اسپەكتىلەرىنە كوڭىل بولە وتىرىپ، جاستاردىڭ ءبىلىم الۋىن دامىتۋعا جاردەم ەتۋگە؛
- بۇقارالىق اقپارات قۇرالدارىنىڭ يەلەرى مەن شىعارۋشىلارىنا وزدەرىنىڭ مورالدىق جاۋاپكەرشىلىگىن ەستەرىنە سالا وتىرىپ، ولاردى، ينتەرنەتتى قوسا العاندا، ب ا ق-تى ءدىنارالىق جانە كونفەسسياارالىق الاۋىزدىقتى تۇتاندىرۋ ءۇشىن پايدالانۋ پراكتيكاسىن توقتاتۋعا شاقىرۋعا، سونداي- اق، ولارعا بەيبىتشىلىك پەن كەلىسىم مادەنيەتىن، دىندەر، حالىقتار جانە مەملەكەتتەر اراسىندا قۇرمەت سەزىمىن ناسيحاتتاۋدى ۇسىنۋعا؛
- قازىرگى الەمنىڭ كەدەيشىلىك، اشتىق، ەپيدەميا، جۇمىسسىزدىق، تابيعي ءزىلزالا مەن تەحنوگەندىك اپاتتار سالدارىمەن كۇرەس سياقتى اناعۇرلىم وزەكتى ماسەلەلەرىن شەشۋ ءۇشىن مەملەكەتتەر مەن قوعامنىڭ ءدىني جانە ساياسي قايراتكەرلەرىنىڭ كۇش- جىگەرىن بىرىكتىرۋگە؛
- استانادا زورلىق- زومبىلىق ەكسترەميزمىنە قارسى كۇرەس جونىندەگى وڭىرلىك كونفەرەنتسيا وتكىزۋ تۋرالى قازاقستاننىڭ باستاماسىن قولداۋعا؛
- الەمدىك جانە ءداستۇرلى دىندەر ليدەرلەرىنىڭ كەزەكتى VI سەزىن 2018 -جىلى استانادا وتكىزۋگە ۋاعدالاستى.
قازاقستان رەسپۋبليكاسى، استانا قالاسى،
2015 -جىلعى 11 -ماۋسىم