ءۇندىستاندا 5 ميلليونعا جۋىق بالا قوقىس جيناپ، كۇن كورۋدە
بۇل - ا ق ش سەكىلدى الىپ مەملەكەتتىڭ حالقىنا جەتەتىن ادام سانى، دەپ حابارلادى www.24.kz.
ونىڭ ۇستىنە وسى تىزىمدەگى سەگىز بالانىڭ بىرەۋى ادام ومىرىنە قاۋىپتى ءارى دەنساۋلىققا زيان جۇمىستاردى اتقارادى. ءبىر عانا ءۇندىستاننىڭ وزىندە ميلليونداعان جاس ۇرپاقتىڭ بالالىق شاعى شىجىعان كۇننىڭ استىندا اۋىر ەڭبەكپەن وتۋدە.
ءۇندى استاناسى نيۋ-دەلي ماڭىنداعى قوقىس تاستالاتىن اۋماقتا ميلليونداعان بالا ەسكى-قۇسقى زاتتاردى جينايدى. بالالىق شاعىن وسىنداي ازاپتى ەڭبەكپەن وتكەرىپ جاتقان جەتكىنشەكتەردىڭ ءبىرى - پاارۆاتي. ونىڭ جاسى بار بولعانى 10 دا.
ءبىر وتباسىنىڭ جەلكىلدەپ ءوسىپ كەلە جاتقان قىزى قالا ماڭىندا ءۇستى-باسى ساسىپ، اياق-قولى ءتىلىنىپ، تاڭعى 5 تە تۇرىپ، قاس قارايعانشا قوقىس تەرىپ ءجۇر. قارشاداي قىزدىڭ بۇدان باسقا امالى جوق. نانىن ارەڭ تاۋىپ وتىرعان وتباسىنا بالانىڭ ءبىلىمى ەمەس، اقشا تاپقانى ءتيىمدى.
«مەكتەپكە بارعىم كەلەدى. قوقىس تاسىعاننان قولدارىم اۋىرادى. ءارى ءبارى ساسىق. ءبىراق اتا- انام كومەككە ءزارۋ»، - دەيدى قوقىس جينايتىن پاارۆاتي ساسو.
سوڭعى جۇرگىزىلگەن ساناق بويىنشا، قازىر ءۇندىستاندا 5 پەن 14 جاس ارالىعىنداعى بۋىنى قاتپاعان 4,5 ميلليون بالا كۇنكورىس قامى ءۇشىن جۇمىسقا جەگىلىپ ءجۇر.
«ءبىزدىڭ ەلدەگى جەتكىنشەكتەردىڭ بالالىق شاعى اۋىر جاعدايدا وتۋدە. ءبىز بۇگىنگى جاس بۋىنعا قاجەتتى ءبىلىمدى بەرە الماساق، ەرتەڭ ولار زارداپ شەگەتىن بولادى. مۇنىڭ ەكونوميكامىزعا تيگىزەر زالالى زور بولماق»، - دەيدى بالالار قۇقىقتارى بويىنشا زەرتتەۋ ورتالىعىنىڭ ديرەكتورى كومال گانوترا.
وتكەن ايدا ءۇندىستان ۇكىمەتى 14 جاسقا دەيىنگى بالالاردىڭ جۇمىس ىستەۋىنە تىيىم سالاتىن زاڭ جوباسىن ۇسىندى. قازىر بۇل قۇجات پارلامەنت قاراۋىندا جاتىر. جوبا ءبىراۋىزدان ماقۇلدانسا، بالالار ەڭبەگىن پايدالانعان جۇمىس بەرۋشىلەرگە 300 دەن 800 ا ق ش دوللارىنا دەيىنگى كولەمدە ايىپپۇل سالىنادى. ءتىپتى زاڭعا باعىنباعانداردى 6 ايدان 2 جىلعا دەيىن باس بوستاندىعىنان ايىرۋ جازاسى بەرىلۋى مۇمكىن.