سايلاۋعا دەيىنگى 5 كۇن ىشىندە ۇگىت-ناسيحات جاريالانعان الەۋمەتتىك جەلى جابىلۋى مۇمكىن
ەگەر Facebook, Twitter، Instagram, «ۆكونتاكتە» جانە باسقا دا الەۋمەتتىك جەلىلەردىڭ قولدانۋشىسى ۇگىت-ناسيحات توقتاتىلعان كۇنى ءوز پاراقشاسىندا قانداي دا ءبىر ۇگىت ماتەريالىن جاريالايتىن بولسا، ۆەب- سايتقا قازاقستان اۋماعىندا تىيىم سالىنۋى مۇمكىن. بۇل تۋرالى ق ر ورتالىق سايلاۋ كوميسسياسى ءتوراعاسىنىڭ ورىنباسارى ۆلاديمير فووس حابارلادى. ەسكە سالايىق، رەسپۋبليكادا ينتەرنەت-رەسۋرستار، ونىڭ ىشىندە، الەۋمەتتىك جەلىلەر دە بۇقارالىق اقپارات قۇرالىنا تەڭەستىرىلگەن.
«داۋىس بەرۋگە دەيىنگى بەس كۇن ىشىندە جانە سايلاۋ كۇنى بۇقارالىق اقپارات قۇرالدارىندا الەۋمەتتىك ساۋالناما ناتيجەلەرىن، سايلاۋ ناتيجەسى تۋرالى بولجامدار، سايلاۋعا قاتىستى باسقا دا زەرتتەۋلەردى جاريالاۋعا جول بەرىلمەيدى»، - دەدى ۆلاديمير فووس.
ينتەرنەت-رەسۋرستار جۇمىسىن توقتاتۋ ءتارتىبى ق ر «بايلانىس تۋرالى» زاڭىنىڭ 41-1-بابىنىڭ 1-تارماعىندا قاراستىرىلعان. وندا الەۋمەتتىك جەلىلەردى ۋاقىتشا توقتاتۋدى باس پروكۋراتۋرا جۇرگىزەتىنى ايتىلعان. سايلاۋ الدى ۇگىت-ناسيحات ناۋقانى ءتارتىبىنىڭ بۇزىلۋى انىقتالعان جاعدايدا باس پروكۋرور ينتەرنەت-رەسۋرستى نەمەسە وندا جاريالانعان اقپاراتقا قولجەتىمدىلىكتى توقتاتۋ جونىندە شارا قابىلدايدى. ءتيىستى نۇسقاۋلىق بەرىلگەننەن كەيىن بايلانىس وپەراتورلارى مەن مەملەكەتتىك تەحنيكالىق قىزمەت ءۇش ساعاتتان اسپايتىن ۋاقىت ىشىندە اتالعان الەۋمەتتىك جەلىنى جابۋى ءتيىس.
ەسكە سالايىق، ق ر پرەزيدەنتىنىڭ كەزەكتەن تىس سايلاۋى 2015-جىلدىڭ 26- ءساۋىرى كۇنى وتەدى. سايلاۋدى وتكىزۋگە قازاقستان حالقى اسسامبلەياسى باستاماشىل بولعان ەدى. سايلاۋ الدى ۇگىت-ناسيحات ناۋقانى 25- ءساۋىر كۇنى ساعات 00.00-دە اياقتالادى.