ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ مالىمەتىنشە، 2011-14 - جىلدارى استاناداعى «ۇلتتىق مەديتسينالىق حولدينگ» كلينيكالارىندا الەمنىڭ 30 دان استام ەلىنەن كەلگەن 5 مىڭعا جۋىق شەتەل ازاماتى ەم العان.
ەرلى- زايىپتى كەتتي مەن پول فەيرچايلدەر قازاقستانعا وسىمەن 2- رەت تابان تىرەدى. ولار مۇندا ساياحاتتاپ ەمەس، قۇرلىق اسىپ ەم ىزدەپ كەلىپتى. كەتتيدى مازالاعان دەرتكە امەريكادان داۋا تابىلماي، «بارماعان جەرى، باسپاعان تاۋى» قالماعان. اعزا جاسۋشاسىنىڭ زاقىمدانۋىنان سال بولعان ايەلىنە «قازاقستانداعى ۇلتتىق عىلىمي مەديتسينالىق ورتالىقتان شيپا قونادى» دەگەندى ەستىگەن پول ويلانباستان وسىندا جەتكەن.
پول فەيرچايلد، ا ق ش ازاماتى:
- قازاقستانعا ءالى بىرنەشە رەت كەلەتىن بولامىز. ءبىرىنشى ەم قابىلداۋدان باستاپ ايەلىمنىڭ جاعدايى وڭالا ءتۇستى. بۇرىندارى ونىڭ نە ايتقىسى كەلگەنىن تۇسىنبەي قينالاتىنبىز. قازىر ءتىلى كۇرمەۋگە كەلە باستادى. مۇنداعى دارىگەرلەردىڭ بىلىكتىلىگىنە كوزىم جەتتى.
باس قالادا بوي كوتەرگەن زاماناۋي كلينيكالار شەتەلدىكتەردى دە ەمدەيتىن پارمەنگە يە بولا باستاعان. اۋرۋىنا داۋا ىزدەپ ءبىزدىڭ ەلگە كەلەتىن جاتجۇرتتىقتاردىڭ قاتارى جىل ساناپ ارتقان. ءتىپتى كورشىلەس ەلدەرمەن قاتار ا ق ش، نيگەريا، تۇركيا، بولگاريا، جاپونيا جانە بىرىككەن اراب امىرلىگى ەلدەرىنەن 2014 - جىلعا دەيىن 5 مىڭعا جۋىق ادام كەلىپ، ەمدەلىپ قايتقان.
بولات كوپەنوۆ، ق ر ۇلتتىق عىلىمي- مەديتسينالىق ورتالىعىنىڭ ءبولىم مەڭگەرۋشىسى:
- ءبىز كلينيكادا اعزا جاسۋشاسىنا قاتىستى ەمدەۋدىڭ تىڭ ءتۇرىن قولدانامىز. قانت ديابەتى، سكلەروز، تۋابىتتى پوتولوگيالىق اۋرۋلاردى ايىقتىرۋعا مۇمكىندىك بار. سوندىقتان جىل باسىنان بەرى امەريكا، قىتاي، ماسكەۋدەن كەلگەن ناۋقاستار ەمدەلىپ كەتىپ جاتىر.
شەتەل ازاماتتارى كوبىنەسە ومىرتقا ديسكى جارىعىن ميكروحيرۋرگيالىق جولمەن الىپ تاستاۋ قىزمەتىنە جۇگىنەدى ەكەن. جۇرەكتەگى قان جولىنا وپەراتسيا جاساتىپ، جاتىر ارتەرياسىنا تالاي ناۋقاس شيپا تاۋىپ قايتقان. ال سۇيەك كەمىگى، بۇيرەك پەن جۇرەك الماستىرۋ وپەراتسيالارى ەداۋىر ارزان. ماسەلەن، باۋىر الماستىرۋ قۇنى قازاقستاندا 20 مىڭ ا ق ش دوللارى بولسا، تۇركيادا بۇل قىزمەت 108 مىڭ دوللار تۇرادى. ال ەلىمىزدە 16 مىڭ ا ق ش دوللارىنا جاسالاتىن بۇيرەك ترانسپلانتاتسياسى رەسەيدە 40 مىڭ دوللارعا تۇسەدى.