جاڭادان قۇرىلاتىن تۇركيا ۇكىمەتىنىڭ 5 باستى ماقساتى
«باعدارلامادا تۇركيانى گلوبالدىق كۇشكە اينالدىرۋ مەن جاڭا اتا زاڭىن قابىلداۋ شارالارىنا ەرەكشە كوڭىل ءبولىنىپ وتىر. سونداي- اق «كۇرت ماسەلەسىن شەشۋ ۇدەرىسى»، «پاراللەل قۇرىلىممەن (مەملەكەت ىشىندەگى مەملەكەت) كۇرەسۋ»، «حالىقتى جۇمىسپەن قامتاماسىز ەتۋ» سىندى باسقا دا تاقىرىپتار كورىنىس تاپقان»، - دەپ جازادى باسىلىم.
احمەت داۆۋتوگلۋ باسقاراتىن 62- ۇكىمەت باعدارلاماسىنىڭ باعىتتارى ايقىندالعانعا ۇقسايدى. اتاپ ايتقاندا، جاڭا ۇكىمەتتىڭ جۇمىس باعىتى تومەندەگى ماقساتتارعا قول جەتكىزۋدى كوزدەيدى:
سىرتقى ساياساتتا بەلسەندى بولۋ
ۇكىمەتتىڭ باعدارلاماسىندا تۇركيانى ايماقتىق جانە گلوبالدىق كۇشكە اينالۋدىرۋ ماقساتىنا اسا ماڭىز بەرىلەتىن بولادى. جاڭا ۇكىمەت تۇركيا ايماقتىق ماسەلەلەردى - سيريا، يراك، مىسىر، پالەستينا ماسەلەلەرىن - شەشۋ باعىتىندا نەگىزگى رولگە يە بولۋى ءۇشىن تەر توكپەكشى. سونداي- اق 50 جىل شاماسىندا جۇرگىزىلىپ كەلە جاتقان تۇركيانى ەۋروپا وداعىنا مۇشەلىككە ەنگىزۋ جۇمىستارى جالعاسىن تاپپاق.
جاڭا اتا زاڭ
تۇركيانىڭ جاڭا اتا زاڭىن قابىلدانۋ قاجەتتىلىگىنە ماڭىز بولىنەتىن بولادى. 2015 - جىلى وتكىزىلەتىن سايلاۋعا دەيىن جاڭا اتا زاڭ بويىنشا ۇلتتىق كەلىسىمگە كەلۋ جۇمىستارى جالعاستىرىلماقشى. جاڭا ۇكىمەت قابىلداعىسى كەلەتىن اتا زاڭنىڭ شەڭبەرى ايقىندالاتىن بولادى. جاڭا اتا زاڭ جەكە ادامداردىڭ قۇقىقتارىن نەگىزگە الاتىن، ۇلتتىق تاتۋلىق پەن جالپىعا ورتاق قۇندىلىقتاردى قورعايتىن، جەكەنىڭ ەمەس، كوپشىلىكتىڭ مۇددەسىنە كوڭىل بولەتىن جانە دەموكراتيالىق قۇقىقتىق مەملەكەتتىڭ بارلىق ەلەمەنتتەرىن قامتيتىن ماتىندە قابىلداناتىن بولادى.
ماسەلەلەردى شەشۋ ۇدەرىسى
تاعى ءبىر ماڭىزدى تاقىرىپ - ول ماسەلەلەردى شەشۋ ۇدەرىسىن جالعاستىرۋ. كۇرت ۇلتىنا بايلانىستى ماسەلەلەردى شەشۋ باعىتىنداعى جۇمىستار جالعاستىرىلماقشى. بۇل باعىتتا ماسەلەنى شەشۋ ۇدەرىسىن جاڭا دەڭگەيگە كوتەرەتىن جاڭا زاڭدار قابىلداۋ مۇمكىنشىلىكتەرى قاراستىرىلاتىن بولادى.
قاۋىپسىزدىككە قاۋىپ تۋدىراتىن جاعدايلار
ۇكىمەت ءوزىنىڭ باعدارلاماسىندا ەڭ الدىمەن «پاراللەل» جۇيەدەن باستاپ، ۇلتتىق قاۋىپسىزدىككە قاۋىپ توندىرەتىن جاعدايلارعا قارسى كۇرەس جۇرگىزەتىنىن اتاپ كورسەتەدى. بۇدان بۇرىنعى ادىلەت جانە دامۋ پارتياسى قۇرعان ۇكىمەتتەردىڭ كەزىندە دە قىلمىستىق توپتار مەن ۇيىمدارعا، زاڭسىز قۇرىلىمدارعا قارسى ناتيجەلى كۇرەس جۇرگىزىلىپ كەلگەنى، بۇل قۇرىلىمدارعا قارسى كۇرەستىڭ بۇدان كەيىن دە جالعاساتىنى جانە ولارعا جول بەرىلمەيتىنى ايتىلعان.
حالىقتى جۇمىسپەن قامتۋ جانە ەكونوميكالىق ءوسۋ
جاڭا ۇكىمەتتىڭ ەكونوميكالىق باعدارلاماسى حالىقتى جۇمىسپەن قامتىپ، ەلدىڭ ەكونوميكالىق الەۋەتىن ارتتىرۋ نەگىزىندە جۇزەگە اسىرىلماقشى. ەكونوميكانى ۇستەمە اقى، بيرجا جانە شەتەلدىك ۆاليۋتاعا تاۋەلدىلىكتەن قۇتقارىپ، شىنايى ءوندىرىس پەن حالىقتى جۇمىسپەن قامتاماسىز ەتۋدى كوزدەيتىن ەكونوميكالىق جۇيەنى دامىتۋ ءۇشىن ءوندىرىستى قولداۋ ساياساتى جۇرگىزىلمەكشى. جۇمىسسىزدىقتى جويۋ شارالارى جالعاستىرىلىپ، حالىقتى جۇمىسپەن قامتۋ ساياساتى دامي تۇسەدى.