بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق مونوپولياعا قارسى دەپارتامەنت باسشىسى ەربولات ىبىرايحانوۆ مالىمدەدى، دەپ حابارلايدى قازاقپارات ءتىلشىسى.
ەربولات ىبىرايحانوۆتىڭ سوزىنشە، ەلباسىنىڭ تاپسىرماسىنا سايكەس، تومەندەتىلگەن تاريفتەر 2019 -جىلدىڭ 1 - قاڭتارىنان باستاپ قولدانىسقا ەنگىزىلەدى. ناتيجەسىندە حالىقتىڭ كوممۋنالدىق قىزمەتكە تولەيتىن قاراجاتى شامامەن 1,15 ميلليارد تەڭگەگە ۇنەمدەلەدى. سونداي- اق، وبلىستا ەلەكتر ەنەرگياسىن تاسىمالداۋ ءتاريفى جاڭا جىلدان باستاپ 10,2 پايىزعا، ياعني 1 كيلوۆات ساعاتقا 7,38 تەڭگەدەن 6,64 تەڭگە دەيىن تۇسەدى.
«تاسىمالداۋ جانە ءوندىرۋشى ستانتسيالاردىڭ تاريفىنىڭ تومەندەۋى ەسەبىنەن تۇپكىلىكتى تاريفتىڭ تومەندەۋى 6,8 پايىزدى كۇرايدى. ياعني حالىققا 14,48 تەڭگەدەن 13,49 تەڭگەگە دەيىن تومەندەيدى. سونىمەن قاتار، 2019 -جىلدىڭ 1 - قاڭتارىنان باستاپ تۇتىنۋشىلاردىڭ قوردالانعان قارىزى ءۇشىن ەلەكتر ەنەرگياسىن قايتا قوسۋ تولەمى 40 پايىزعا تومەندەدى» ، - دەدى ەربولات ىبىرايحانوۆ.
تابيعي گازبەن قامتاماسىز ەتۋ سالاسى بويىنشا 2019 -جىلدىڭ 1 - قاڭتارىنان باستاپ تاسىمالداۋ جانە كوتەرمە باعا ءتۇسۋ ەسەبىنەن حالىق ءۇشىن گاز تاريفى 5,8 پايىزعا ارزانداپ، 1 تەكشە مەترى جەكە تۇلعالارعا - 32,47 تەڭگە، ال حالىقتى جىلۋمەن قامتاماسىز ەتەتىن زاڭدى تۇلعالارعا - 28,27 تەڭگە بولادى.
سونداي- اق، وبلىستا ورتالىقتاندىرىلعان جىلۋمەن قامتاماسىز ەتەتىن 6 مەملەكەتتىك كوممۋنالدىق كاسىپورىن بار. كومىر وتىنىن قولدانا وتىرىپ، جىلۋ ەنەرگياسىن شىعاراتىن مەكەمەلەر تاريفىن 7-24 پايىز ارالىعىندا ءتۇسىرىپ وتىر. قالعان 2 مەكەمە تابيعي گاز ارقىلى جىلۋ ەنەرگياسىن وندىرەدى. بۇل - سارىاعاش جانە تولەبي اۋداندارىنداعى مەكەمەلەر. ولار تاريفىن 11-15 پايىز ارالىعىندا تۇسىرمەك.
بۇدان وزگە، اۋىز سۋ، اعىن سۋ جانە سۋ بۇرۋ قىزمەتىمەن اينالىساتىن 39 سۋبەكتى 2019 -جىلدىڭ 1 - قاڭتارىنان باستاپ تاريفتى 5-13 پايىز ارالىعىندا ارزانداتادى.