سەمەيدە 57 جىلقى سۋعا باتىپ ءولدى: شارۋا يەسى التىن قازۋشىلاردى كىنالاپ وتىر
«الەۋمەتتىك جەلىلەردە اباي وبلىسى، جارما اۋدانىنىڭ قويتاس اۋىلىندا جىلقىلار جاپپاي ۋلانعانى تۋرالى اقپارات شىندىققا جاناسپايدى.
وبلىستىق ۆەتەريناريا باسقارماسىنىڭ جانە جىلقى يەسىنىڭ مالىمەتىنشە، بۇل وقيعا بىلتىر بولعان. سول كەزدە جىلقىلار شۇڭقىرعا ءتۇسىپ، ءۇيىر استىندا تاپتالىپ، سۋعا باتىپ كەتكەن»، - دەلىنگەن اكىمدىك مالىمەتىندە.
«تايلاق» شارۋا قوجالىعىنىڭ يەسى ولجاس ەرسىنوۆتىڭ ايتۋىنشا، جىلقىلار التىن قازۋشىلاردىڭ كەسىرىنەن ولگەن.
«ءبىزدىڭ قىستاق جارما اۋدانىندا بولعانىمەن، جايلاۋىمىز كوكپەكتى اۋدانىندا. سوعان 21 جىل بويى ءبىر جولمەن اپارامىز. ءبىراق، التىن قازۋشىلار قويتاس اۋىلىنىڭ جانىنداعى وزەننىڭ جاعاسىن اۋىر تەحنيكامەن قازىپ تاستاعانى سونشالىق، ۇلكەن جىرالار پايدا بولدى. وزەندى وتەمىن دەگەن مىڭ جىلقى سول جىرالاردا كەپتەلىپ قالىپ، 57 جىلقى سۋعا باتىپ كەتتى»، - دەيدى ولجاس ەرسىنوۆ.
شارۋاشىلىق يەسى جارما اۋدانى، قويتاس اۋىلىنىڭ ماڭىنداعى وزەندە التىن وندىرۋشىلەرگە قاتىستى جەرگىلىكتى حالىقتىڭ نارازىلىن جەتكىزگەن.
«جەرگىلىكتى حالىق وزەننىڭ بويىنداعى جىرالاردى جاۋىپ، جاعاسىن قالىپقا كەلتىرۋدى سۇراپ وتىر. بۇل جاعدايدىڭ ءمان- جايىن انىقتاۋ ءۇشىن اباي وبلىسىنىڭ اكىمى نۇرلان ۇرانحايەۆتىڭ تاپسىرماسىمەن وبلىستىق پروكۋراتۋرا، پوليتسيا جانە ەكولوگيا دەپارتامەنتىنىڭ وكىلدەرى ارنايى تەكسەرىس جۇرگىزۋگە اۋدانعا جىبەرىلدى. تەكسەرىستىڭ ناتيجەسى تۋرالى قوسىمشا اقپارات بەرىلەدى»، - دەپ ناقتىلادى وبلىس اكىمدىگىنەن.