الماتى قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە، الماتى قالالىق ونكولوگيالىق ورتالىعىنا ۇيقى بەزى قۇيرىعىنىڭ ىسىگى بار ناۋقاس تۇسكەن. دارىگەرلەر وعان كوكباۋىردى ساقتايتىن ديستالدى ۇيقى بەزىنىڭ رەزەكسياسى (كيمۋر وتاسى) بىرەگەي شاعىن ينۆازيۆتى وتاسىن جاسادى.
«وتانىڭ ەرەكشەلىگى ەش كەسۋسىز - لاپاروسكوپيالىق ادىسپەن جاسالادى. ەڭ باستىسى مۇنداي وتا كەزىندە دارىگەرلەر كوكباۋىردى ساقتاپ قالادى. بۇل پاتسيەنتتىڭ دەنساۋلىعى ءۇشىن ماڭىزدى، ويتكەنى، كوكباۋىر باكتەريا مەن ۆيرۋستارمەن كۇرەسۋ ءۇشىن قاندى سۇزۋگە جانە انتيدەنەلەردى وندىرۋگە قاتىساتىن ورگان»، - دەپ حابارلادى قوعامدىق دەنساۋلىق ساقتاۋ باسقارماسىندا.
ونكوحيرۋرگيا بولىمشەسىنىڭ مەڭگەرۋشىسى نۇرلان بالتايەۆتىڭ ايتۋىنشا، كوكباۋىردى ساقتاپ قالۋ ءۇشىن بارلىق تارماقتاردى تاۋىپ، بىتەۋ كەرەك بولدى. سەبەبى، تارماقتار كوكباۋىردان ۇيقى بەزىنىڭ قۇيرىعىنا دەيىن سوزىلادى.
«بۇعان دەيىن مۇنداي دياگنوز كەزىندە كوكباۋىردى ىسىكپەن بىرگە الىپ تاستايتىنبىز. قازىر جاڭا ادىستەر مەن قۇرال- جابدىقتاردىڭ ارقاسىندا كوكباۋىردى ساقتاي وتىرىپ، وسىنداي وتالاردى جاساي باستادىق. اتالمىش وتا ءبىر ساعاتقا سوزىلدى. وتا كەزىندە كوكباۋىردى قۇتقارۋ ءۇشىن ءبىز ۇيقى بەزىنىڭ قۇيرىعىنا تىكەلەي باراتىن بارلىق تارماقتاردى تاۋىپ، ولاردى بىتەدىك. بارلىعى جاقسى ءوتتى. ناۋقاستىڭ كوكباۋىرىن ساقتاپ، ىسىكتى الىپ تاستادىق، ول گيستولوگيالىق زەرتتەۋگە جىبەرىلدى. ناۋقاس وتادان كەيىنگى كەلەسى كۇنى بولىمشەگە اۋىستىرىلدى»، - دەدى نۇرلان بالتايەۆ.
سونداي- اق ونىڭ، مۇنداي وتا كەسۋسىز جاسالادى، دەمەك از مولشەردە قان جوعالتۋمەن ەرەكشەلەنەدى جانە وتادان كەيىنگى العاشقى كۇندەردە- اق ناۋقاس قالپىنا تەزىرەك كەلىپ، وتادان كەيىنگى اسقىنۋلار بارىنشا ازايا تۇسەدى.
وسى ورايدا الماتىلىق ونكولوگتار دياگنوزدىڭ ۋاقىتىندا قويىلۋى تولىق ساۋىعۋعا مۇمكىندىك بەرەتىنىن ەسكەرتتى.
اۆتور
الما مۇقانوۆا