قازاقستاندا وندىرىلگەن ۋران كولەمى 5650 تونناعا جەتتى

استانا. قازاقپارات - 2014- جىلدىڭ II توقسانىنىڭ قورىتىندىسى بويىنشا قازاقستان رەسپۋبليكاسىندا وندىرىلگەن ۋران كولەمى جوسپارلىق كورسەتكىشتەرگە سايكەس 5650 تونناعا جەتتى. سونىڭ ىشىندە «قازاتومونەركاسىپ» ۇ ا ك» ا ق ەنشىلەس جانە باعىنىشتى كاسىپورىندارداعى ۇلەسىن قوسا ەسەپتەگەندە 2014 -جىلدىڭ II توقسانىندا وندىرگەن ۋران كولەمى 3278 توننا بولىپ وتىر. بۇل تۋرالى كومپانيانىڭ قوعاممەن بايلانىس باسقارماسىنان حابارلاندى.

«ەسەپتى كەزەڭدە «ءۇلبى مەتاللۋرگيا زاۋىتى» ا ق 476 توننا بەريلليي جانە 65 توننا تانتال ونىمدەرىن شىعاردى. ال «م ا ە ك- قازاتومونەركاسىپ» ج ش س 2014- جىلدىڭ ءساۋىر-ماۋسىم ايلارىندا اقتاۋ قالاسى مەن ماڭعىستاۋ وبلىسىنداعى تۇتىنۋشىلار ءۇشىن 1153 ميلليون كۆت-ساعات ەلەكتر ەنەرگياسىن، 650 مىڭ گكال جىلۋ ەنەرگياسىن، 313 ميلليون تەكشە مەتر سۋ، سونىڭ ىشىندە 3,05 ميلليون تەكشە مەتر اۋىز سۋ ءوندىردى. بۇل كورسەتكىشتەر ءوڭىردىڭ قۋات رەسۋرستارى مەن سۋعا بولعان سۇرانىسىن قاناعاتتاندىرا الادى»، - دەلىنگەن باسپا ءسوز بايانىندا.

جالپى، «قازاتومونەركاسىپ» ۇ ا ك» ا ق ءوزىنىڭ دامۋ باعدارلاماسىنا سايكەس ەكىنشى توقساندا ستراتەگيالىق باعىت بويىنشا كونۆەرسيا، بايىتۋ جانە يادرولىق وتىن ءوندىرۋ سالالارىنداعى جۇمىستارىن تابىستى جالعاستىردى. سونىڭ ىشىندە، «SARECO» ب ك» ج ش س 2014- جىلدىڭ II توقسانىندا سيرەك جەر مەتالدارىنىڭ جيىنتىق كونسەنتراتىن ءبولۋ جانە ودان ءارى جاپونياعا جەتكىزۋ ءۇشىن جونەلتۋدى باستادى. ال «Astana Solar» ج ش س II توقساندا جيىنتىق قۋاتى 2,2 مۆت ەنەرگياعا تەڭ 9231 پانەل شىعارعان.

اۆتور: قانات مامەتقازى ۇلى