بيىلعا 56 ەلدى مەكەندى گازبەن قامتاماسىز ەتۋ اياسىندا 86 جوبا جوسپارلانعان - رومان سكليار
14:26, 17 - اقپان 2023
استانا. قازاقپارات - ەلدى گازداندىرۋ دەڭگەيى 60 پايىزعا جەتكىزىلەدى. بۇل تۋرالى سەناتتا «ءتيىمدى وڭىرلىك ساياسات - ەلىمىزدىڭ ورنىقتى الەۋمەتتىك- ەكونوميكالىق دامۋىنىڭ نەگىزى» تاقىرىبىنداعى پارلامەنتتىك تىڭداۋدا پرەمەر- ءمينيستردىڭ ءبىرىنشى ورىنباسارى رومان سكليار ءمالىم ەتتى، دەپ حابارلايدى قازاقپارات ءتىلشىسى.
«ەل تۇرعىندارىن گازبەن قامتۋ اياسىندا بىلتىر 142 جوبا جۇزەگە استى. بيىل 56 ەلدى مەكەننىڭ 167 مىڭ تۇرعىنىن گازبەن قامتاماسىز ەتۋ ءۇشىن 86 جوبا جوسپارلانعان. بۇل ەلدى گازداندىرۋ دەڭگەيىن 60 پروتسەنتكە جەتكىزۋگە مۇمكىندىك بەرەدى. ەنەرگەتيكالىق بايلانىس سولتۇستىك جانە ورتالىق- شىعىس ايماقتاردى گازداندىرۋدى اياقتاۋ جانە باتىس وڭىرلەرىن ءبىرىڭعاي ەنەرگەتيكالىق جۇيەگە قوسۋ ارقىلى جۇزەگە اسپاق»، - دەدى ر. سكليار.
بۇدان بۇرىن حابارلانعانداي، پرەمەر- ءمينيستردىڭ ءبىرىنشى ورىنباسارى ەلىمىزدەگى جىلۋ ەلەكتر ستانسيالارى مەن ەلەكتر جەلىلەرىنە ريەۆيزيا جۇرگىزىلىپ جاتقانىن ايتتى. بۇل تەكسەرۋ بيىلدىڭ ءبىرىنشى توقسانىندا اياقتالادى.
2025 -جىلدىڭ سوڭىنا دەيىن حالىقتى اۋىز سۋمەن قامتۋ 100 پايىزدى قۇرايدى.
اۆتور
رۋسلان عابباسوۆ