قازاقستاننىڭ ءشول جانە شولەيت جەرلەر 56 پايىزىن، ورماندى القابى ەل اۋماعىنىڭ نەبارى 4,6 پايىزىن قۇرايدى - ساراپشى

استانا. قازاقپارات - قازاقستاننىڭ ورماندى القابى ەلدىڭ بارلىق ايماعىنىڭ 4,6 پايىزىن قۇرايدى. بۇل تۋرالى س. سەيفۋللين اتىنداعى قاز ا ت ۋ-ىنىڭ ورمان رەسۋرستارى جانە ورمان شارۋاشىلىعى كافەدراسىنىڭ مەڭگەرۋشىسى داني سارسەكوۆا بۇگىن ەلوردادا اشىلعان ورمانداردى قالپىنا كەلتىرۋ جانە قۇنارلاندىرۋ تاقىرىبىنا ارنالعان حالىقارالىق عىلىمي فورۋمنىڭ بارىسىندا ايتتى.

«ءبىزدىڭ ەلىمىزدىڭ اۋماعى وتە ۇلكەن، الايدا ورماندى القابىمىز نەبارى سونىڭ 4,6 پايىزىن قۇرايدى. ءبىزدىڭ كليماتىمىز ءار الۋان، توپىراق جاعدايى دا ءارتۇرلى، ال ءشول جانە شولەيت جەرلەر قازاقستاننىڭ 56 پايىزىن الىپ جاتىر. ءبىزدىڭ مىندەتىمىز - ورماندى ساقتاپ قالۋ جانە ونى قالپىنا كەلتىرۋ. جىل سايىن كوشەتتەر وتىرعىزىلادى، وسى جولمەن تاياۋ ۋاقىتتا ورماندى تىم بولماعاندا 5 پايىزعا ۇلعايتپاقپىز. بۇگىندە، وزدەرىڭىز بىلەسىزدەر، استانا اينالاسىندا «جاسىل بەلدەۋ» قۇرىلدى. قازىر ونىڭ اۋقىمى 65 مىڭنان استام گەكتاردى قۇرايدى»، - دەدى ول.

سونداي-اق ول فورۋم قاتىسۋشىلارى قول جەتكىزۋدى جوسپارلاپ وتىرعان نەگىزگى ماقساتتاردى اتاپ ءوتتى.

«فورۋمدا ورماندى قالپىنا كەلتىرۋ جانە قۇنارلاندىرۋ تۋرالى پىكىرلەر الماسىلادى، سەبەبى بۇل ماسەلە قازاقستاندا عانا ەمەس، شولەيت ايماقتاردا ورنالاسقان الەمنىڭ بارشا مەملەكەتتەرىندە وزەكتى ماسەلەگە اينالعان. ولاردى قالپىنا كەلتىرۋدىڭ قانداي دا ءبىر ورتاق ءادىسىن تابامىز دەپ سەنەمىن»، - دەپ ءسوزىن تۇيىندەدى سارسەكوۆا.

حالىقارالىق عىلىمي فورۋم قازاق اگروتەحنيكالىق ۋنيۆەرسيتەتىندە وتۋدە. ونىڭ جۇمىسىنا قازاقستاننىڭ اۋىل شارۋاشىلىعى، ءبىلىم جانە عىلىم مينيسترلىكتەرىنىڭ وكىلدەرى، الەمنىڭ 20 عا جۋىق ەلىنەن ورمان شارۋاشىلىعى سالاسىنداعى جەتەكشى ج و و- لارىنىڭ جانە ۇيىمدارىنىڭ ماماندارى قاتىسۋدا.