اقمولا وبلىسىندا ادام سانى از 55 اۋىل جويىلۋى مۇمكىن
اقمولا وبلىستىق ەكونوميكا جانە بيۋجەتتىك جوسپارلاۋ باسقارماسىنىڭ مالىمەتىنشە، بۇگىندە اۋىلداردا 385 مىڭ ادام نەمەسە ءوڭىر حالقىنىڭ جالپى سانىنىڭ 52 پايىزى تۇرادى (733,9 مىڭ ادام). اۋىلدىق ەلدى مەكەندەردى دامىتۋ بويىنشا جۇرگىزىلىپ جاتقان ءىس-شارالارعا قاراماستان، حالىقتىڭ اۋىلدىق جەرلەردەن كەتۋى بايقالىپ وتىر.
«وڭىردە 10 جىل ىشىندە اۋىل تۇرعىندارىنىڭ سانى 5 مىڭ ادامعا ازايدى، بۇل رەتتە قالا تۇرعىندارىنىڭ سانى 7,6 مىڭ ادامعا ءوستى. ۋربانيزاتسيا پروتسەسىنىڭ ۇدەيە ءتۇسۋى اۋىلدار سانىنىڭ تۇراقتى ازايۋىنا الىپ كەلۋدە. تەرىسكەيدەگى كەرەگەسى سوگىلگەن اۋىلداردىڭ سانى الداعى جىلداردا كوبەيمەسە، ازاياتىن ءتۇرى جوق. «قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى» زاڭعا سايكەس تۇراقتى حالقى 50 ادامنان اسپايتىن اۋىلدار جويىلۋى ءتيىس. اقمولا وبلىسىندا مۇنداي 55 اۋىل بار. وڭىردەگى ءتۇتىنى ۇزىلگەلى تۇرعان ەلدى مەكەندەردە جالپى سانى 1647 ادام عانا تۇرادى. سونىڭ ىشىندە بۋراباي اۋدانىنداعى جاڭاتۋعان اۋىلىندا ادام مۇلدەم جوق»، - دەيدى اقمولا وبلىستىق ەكونوميكا جانە بيۋجەتتىك جوسپارلاۋ باسقارماسى باسشىسىنىڭ ورىنباسارى فاريزا بايمانوۆا.
باسقارما باسشىسىنىڭ ورىنباسارى اتاپ وتكەندەي، 2011-جىلدان بەرى وبلىستا جالپى سانى 740 ادام بولاتىن 34 اۋىل تاراتىلعان.
«وبلىسىمىزدا بارلىعى 589 اۋىلدىق ەلدى مەكەن بار، ونىڭ تەڭ جارتىسىنىڭ پەرسپەكتيۆاسى بار اۋىلدار. ول «اۋىلدىق ەلدى مەكەندەردى ايقىنداۋ ءۇشىن ولشەمشارتتاردى بەكىتۋ تۋرالى» قازاقستان رەسپۋبليكاسى ۇلتتىق ەكونوميكا ءمينيسترىنىڭ (2019 -جىلعى 13 قىركۇيەكتەگى 81№) بۇيرىعىمەن بەلگىلەنگەن 15 كورسەتكىش بويىنشا باعالاۋ قورىتىندىسىمەن ايقىندالعان. بۇل اۋىلداردا 364 مىڭ ادام، ياعني وڭىردەگى اۋىل حالقىنىڭ 86 پايىزى تۇرادى»، - دەپ تولىقتىردى فاريزا بايمانوۆا.
ايتا كەتسەك، مەملەكەت باسشىسى قازاقستان رەسپۋبليكاسىنىڭ اۋىلدىق اۋماقتارىن دامىتۋدىڭ 2023-2027-جىلدارعا ارنالعان تۇجىرىمداماسى تۋرالى جارلىققا قول قويعان بولاتىن.