قازاقستان- قىتاي گاز قۇبىرىنىڭ قۋاتتىلىعى جىلىنا 55 ميلليارد تەكشە مەترگە جەتەدى

استانا. قازاقپارات - «قازاقستان- قىتاي» گاز قۇبىرىنىڭ ءۇشىنشى «س» جەلىسى جانە ەكى كومپرەسسورلىق ستانسانىڭ قۇرىلىسى تولىقتاي شەتەلدىك يۆەستيتسيامەن جۇزەگە استى.

بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ەنەرگەتيكا ۆيتسە-ءمينيسترى ماعزۇم مىرزاعاليەۆ ءمالىم ەتتى.

«وسىدان ءبىر اپتا بۇرىن الماتى وبلىسى جامبىل اۋدانىندا «قازاقستان- قىتاي» گاز قۇبىرىنىڭ ءۇشىنشى «س» جەلىسى جانە ەكى كومپرەسسورلىق ستانسا ىسكە قوسىلىپ، گازدى ايداۋ جۇمىستارى باستالدى. سونىمەن قاتار 2017 -جىلى اياقتالاتىن التى كومپرەسسورلىق ستانسا سالىنىپ بولعان سوڭ «س» جەلىسىنىڭ جىلدىق ونىمدىلىگى 25 ميلليارد تەكشە مەتردى قۇرايدى. ناتيجەسىندە، «قازاقستان- قىتاي» قۇبىرىنىڭ قۋاتتىلىعى جىلىنا 30-دان 55 ميلليارد تەكشە مەترگە جەتەدى»، - دەدى م. مىرزاعالييەۆ.

ونىڭ سوزىنە قاراعاندا، اتالعان جوبا تولىعىمەن شەتەلدىك ينۆەستيتسيالارمەن قارجىلاندىرىلدى. قۇرىلىس جۇمىستارى جۇرگىزىلگەن كەزدە 14 مىڭنان استام ادام جۇمىسپەن قامتىلعان بولاتىن، ال پايدالانۋ كەزىندە تاعى مىڭنان استام جاڭا جۇمىس ورنى اشىلادى دەپ جوسپارلانۋدا.

اۆتور: رۋسلان عابباسوۆ