مينيستر قازاق حاندىعىنىڭ 550 جىلدىعىنا ارنالعان تەلەحيكايا قاشان جارىققا شىعاتىنىن ايتتى
«بيىل ءبىز قازاق حاندىعىنىڭ 550 جىلدىعىنا ارنالعان ءوزىمىزدىڭ ۇلتتىق تەلەحيكايامىزدى شىعارۋدى جوسپارلاپ وتىرمىز. ءبىز ازداپ ونىڭ كولەمىن ۇلعايتتىق. تۋىندىنى وتە ۇلكەن ەتىپ تۇسىردىك. ەندى ونى ۇلكەن ەكرانداردا كورسەتۋ ءۇشىن ۇلكەن تەحنيكالىق جۇمىس اتقارىلۋى ءتيىس. قازىر جۇمىس قارقىندى ءجۇرىپ جاتىر. مەنىڭ ويىمشا، كۇزدە بۇل تۋىندى پروكاتقا شىعىپ قالۋى كەرەك»، - دەپ اتاپ ءوتتى مينيستر.
سونىمەن قاتار، ءمينيستردىڭ ايتۋىنشا، رەسەيلىك رەجيسسەردىڭ تۇسىرۋىمەن «28 پانفيلوۆشى» اتتى فيلمنىڭ ءتۇسىرىلىمى جۇرگىزىلۋدە. سونداي-اق قازاقستاندىق جانە قىتايلىق كينوگەرلەردىڭ ارىپتەستىك ورناتۋىمەن بىرلەسكەن جوبالار قولعا الىنباق.
«قازىرگى ۋاقىتتا مينيسترلىك ۇكىمەتتىڭ تاپسىرماسىمەن قازاقستاننىڭ كينويندۋسترياسىن دامىتۋ تۇجىرىمداماسىن دايىنداۋدا. بۇل سالانى جاڭا دەڭگەيگە شىعاراتىن كەز كەلدى»، - دەدى ا. مۇحامەدي ۇلى.
اۆتور: جاسۇلان جولدىبايەۆ