قازاق حاندىعىنىڭ 550 جىلدىعىنا وراي فوتو بايقاۋ جاريالاندى
بايقاۋ شارتتارى: بايقاۋعا جاسى 25 تەن اسپاعان جاستار قاتىسا الادى. ول ءۇشىن، نيەت بىلدىرگەندەر، ءوزىنىڭ پورترەتتى سۋرەتتەرىن كومپانيانىڭ ەلەكتروندى پوشتاسىنا «كومپانيا كەلبەتى» دەگەن حات تاقىرىبىمەن جولداۋى كەرەك. سۋرەتتەر قازان ايىنىڭ سوڭعى كۇنىنە دەيىن قابىلدانادى.
قابىلداۋ ۋاقىتى اياقتالعان سوڭ، ارنايى قۇرىلعان كوميسسيا جەڭىمپازداردى انىقتايدى. فوتوبايقاۋدا جەڭىپ شىققان ءبىر جىگىت پەن ءبىر قىز 3 جىلعا دەيىن كومپانيانى تانىستىراتىن بولادى. سونداي-اق جەڭىمپازدارعا كاسىبي فوتوگرافپەن ءوزىنىڭ جەكە فوتوسەسسياسىن جاساۋعا مۇمكىندىك بەرىلەدى.
ال كومپانيا نەلىكتەن اتالمىش بايقاۋدى قازاق حاندىعىنىڭ 550 جىلدىعىنا ورايلاستىردى دەگەن سۇراققا كەلەتىن بولساق، كومپانيا باسپا ءسوز حاتشىسى امانبەك تولەپبەرگەنوۆتىڭ ايتۋىنشا، تاڭدالعان «كومپانيا كەلبەتى» ۇلتتىق ناقىشتا كيىنەتىن بولادى، وسىلايشا بۇل تەك كومپانيا كەلبەتى ەمەس، مەملەكەت كەلبەتى بولۋى مۇمكىن.
«سوڭعى كۇندەرى ەلىمىزدە بارلىعى ۇلتتىق تاريح پەن ادەت-عۇرىپقا كوپ كوڭىل بولۋدە. ءدال وسى ۋاقىتتا ءبىز كومپانيا تاريحىندا التىن ارىپپەن جازىلاتىن وزىندىك تاريحىمىزدى دارىپتەي الامىز»، - دەپ ءتۇسىندىردى كومپانيا باسپا ءسوز حاتشىسى.
تاعى ءبىر ايتا كەتەتىن جايت، «ترانس تەلەكوم» ا ق ەكسپو-2017 كورمەسىنە ارنالعان «بولاشاق قالا» ينتەگراتسيالىق جۇيەسىن جاساپ جاتقانى بەلگىلى. وسىعان وراي، «كومپانيا كەلبەتى» بولىپ تاڭدالعان جاستار ەكسپو-2017 دە كومپانيانى عانا تانىستىرىپ قويماي، جالپى قازاق داستۇرىنە دە نازار اۋدارتاتىن بولادى.
«ەلىمىزدىڭ سىرعا تولى ءداستۇرىمىزدى كەلگەن قوناقتارعا پاش ەتۋدە، بۇل ءبىزدىڭ كىشكەنتاي عانا ۇلەسىمىز بولار دەگەن ويدامىز»، - دەپ قورىتتى ءوز ويىن امانبەك تولەپبەرگەنوۆ.