قازاق حاندىعىنىڭ 550 جىلدىعىن اتاپ ءوتۋ - قازاقستانداعى وزگە ەتنوستارعا دا ءوز تاريحىن تەرەڭ زەرتتەپ بىلۋگە مۇمكىندىك بەرەدى
بۇل تۋرالى كەشە الماتىداعى «دوستىق ۇيىندە» وتكەن «جەر تاريحى - ەل تاريحى» اتتى دوڭگەلەك ۇستەل بارىسىندا الماتى قالالىق قازاقستان حالقى اسسامبلەياسى ءتوراعاسىنىڭ ورىنباسارى، وسەتين ەتنومادەني بىرلەستىگىنىڭ ءتوراعاسى قازبەك مامسۋروۆ مالىمدەدى.
«ءوز حالقىنىڭ تاريحىن بىلمەگەن ادام، وزگە حالىقتاردىڭ دا تاريحىن ءبىلىپ جارىتپايدى. دەمەك، ول وزگە حالىقتىڭ وكىلدەرىمەن دە جەتكىلىكتى دارەجەدە ىنتىماقتاستىق ورناتا المايدى دەگەن ءسوز.
سوندىقتان، بيىل ەلىمىزدە اتاپ ءوتىلىپ جاتقىن قازاق حاندىعىنىڭ 550 جىلدىعى قازاقستاندا ءومىر ءسۇرىپ كەلە جاتقان 130 دان استام ەتنوسقا قازاق حالقىنىڭ عانا ەمەس، ءوز حالقىنىڭ دا تاريحىن تەرەڭ زەرتتەپ بىلۋگە مۇمكىندىك بەرەدى. وتكىزىلىپ جاتقان كونفەرەنتسيالار، كورمەلەر، كەزدەسۋلەر، بايقاۋلار سوعان جول اشادى. مۇنىڭ بارلىعى تۇپتەپ كەلگەندە ءبىر-ءبىرىمىزدى جاقسى ءتۇسىنىپ، بىرىگىپ، ەلباسىنىڭ ۇسىنعان بەس ينستيتۋتسيونالدىق رەفورماسىن جۇزەگە اسىرۋدا 100 ناقتى قادامدى ورىنداۋعا سەپتىگىن تيگىزەدى»، - دەدى قازبەك مامسۋروۆ.
دوڭگەلەك ۇستەل قازاق حاندىعىنىڭ 550 جىلدىعىنا وراي ۇيىمداستىرىلعان «ۇلى دالا ەلى» تاريحي-مادەني ەكسپەديتسياسى اياسىنداعى وتكىزىلىپ وتىر. وعان الماتى قالالىق قازاقستان حالقى اسسامبلەياسىنىڭ مۇشەلەرى، قوعام قايارتكەرلەرى، تاريحشى عالىمدار، جوعارى وقۋ ورىندارىنىڭ ستۋدەنتتەرى قاتىستى.
سونداي-اق، دوڭگەلەك ۇستەل اياسىندا «ن. ءا. نازاربايەۆتىڭ قوعامدىق كەلىسىم مەن ۇلتتىق بىرلىكتىڭ قازاقستاندىق ۇلگىسى» تاقىرىبىندا دارىستىك تانىستىرىلىم وتكىزىلدى.
بۇدان باسقا، دوستىق ۇيىندە قازاق حاندىعىنىڭ تاريحىنا ارنالعان جانە ن. ءا. نازاربايەۆتىڭ ەتنوسارالىق تولەرانتتىلىق پەن قوعامدىق كەلىسىمنىڭ قازاقستاندىق ۇلگىسىنە ارنالعان كىتاپ كورمەسى ۇيىمداستىرىلدى.
قازاقستان حالقى اسسامبلەياسى «ۇلى دالا ەلى» تاريحي-مادەني ەكسپەديتسياسى تاراز قالاسىندا «تاريح تولقىنىنداعى ۇلى دالا» اتتى كورمەمەن قورىتىندىلانادى.
اۆتور: جاپپاربەرگەن ايبوتا