قازاق حاندىعىنا 550 جىل: ب ق و- دا بوكەنباي باتىرعا ارنالعان شارالار وتكىزىلدى - فوتو

ورال. قازاقپارات - شىڭعىرلاۋ اۋدانىندا داڭقتى قولباسشى، ساياساتكەر بوكەنباي قاراباتىر ۇلىنىڭ ەسىمى قۇرمەتپەن اتالادى.

قازاق حاندىعىنىڭ 550 جىلدىعىنا وراي اۋداندىق مادەنيەت ۇيىندە «قازاق حاندىعى جانە ءباھادۇر بوكەنباي باتىر» اتتى عىلىمي كونفەرەنسيا ۇيىمداستىرىلدى.

وندا اۋدان اكىمى الديار حالەلوۆ وڭىردە بوكەنباي باتىردىڭ ەسىمىن ماڭگى ەستە قالدىرۋ باعىتىندا ءبىرقاتار شارالار قولعا الىنعاندىعىن جەتكىزدى.

كونفەرەنسيادا ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ پروفەسسورلارى، فيلولوگيا عىلىمدارىنىڭ دوكتورى الپىسباي مۇسايەۆ، بوكەنباي باتىردىڭ ۇرپاعى ايسۇلۋ تاسيموۆا، تاسمولا ورتا مەكتەبىنىڭ ديرەكتورى ەرلان ايشۋاقوۆ، اۋداندىق بالالارمەن مەكتەپتەن تىس جۇمىس ورتالىعىنىڭ ديرەكتورى قۋانىش ەسەنوۆ بايانداما جاساپ، ازاتتىق ءۇشىن الىسىپ وتكەن ەر تۋرالى دەرەكتەر كەلتىردى.

جيىندا بوكەنباي قاراباتىر ۇلىنىڭ ءومىرى تۋرالى بيىل تۇسىرىلگەن «اققۇمنان شىققان اقبەرەن» اتتى دەرەكتى فيلم (اۆتورى - بەلگىلى تەلەجۋرناليست، اقىن مۇنايدار بالمولدا) تۇڭعىش رەت كورسەتىلدى.

سونىمەن قاتار اۋدان ورتالىعى شىڭعىرلاۋ اۋىلىندا بوكەنباي باتىرعا كوشە اتى بەرىلىپ، ول دا سالتاناتپەن اشىلدى.

ەسكە سالا كەتەيىك، بوكەنباي قاراباتىر ۇلى (ХVІІІ  عاسىردىڭ ەكىنشى جارتىسى - ءساۋىر، 1742، اقتوبە وبلىسى، بوكەنباي شوقىسى) - جوڭعار باسقىنشىلارىنا قارسى كۇرەستە بىرىككەن قازاق اسكەرىنىڭ باس ساردارى بولعان اتاقتى باتىر، مامىلەگەر، ەلشى. كىشى ءجۇزدىڭ تابىن رۋىنان شىققان بوكەنباي باتىر ءابىلقايىر حانمەن تىزە قوسىپ، وتىز جىل بويى سىرتقى جاۋمەن كۇرەستى. 1742-جىلعى ساۋىردە تۇركىمەندەرمەن بولعان شايقاستا ەرلىكپەن قازا تاپتى.

اۆتور: ەلجان ەرالى