سولتۇستىك قازاقستاندىقتاردا قازاق حاندىعىنىڭ 550 جىلدىعى اتالىپ ءوتتى - فوتو

پەتروپاۆل. قازاقپارات - وبلىس ورتالىعى - پەتروپاۆلدا قازاق حاندىعىنىڭ 550 جىلدىعىنا ارنالعان مەركەلىك كونسەرتتىك باعدارلاما قويىلدى. بۇل ماڭىزدى اتاۋلى تاريحي كۇنمەن سولتۇستىك قازاقستاندىقتاردى وبلىس اكىمى ەرىك سۇلتانوۆ قۇتتىقتادى،

 دەپ حابارلادى ءوڭىر باسشىسىنىڭ باسپا ءسوز قىزمەتى.

«قازاق حاندىعىنىڭ 550 جىلدىعىنا ارنالعان سالتاناتتى جينالىستا سويلەگەن سوزىندە ەل پرەزيدەنتى نۇرسۇلتان نازاربايەۆ «ۇلى اتا- بابالارىمىزدىڭ ۇلى رۋحىنا بارلىق ۇرپاقتار تاعزىم ەتەدى. ولاردىڭ مەملەكەتتىلىكتى ساقتاۋداعى وراسان ەڭبەگى ەشقاشان ۇمىتىلمايدى»، دەپ اتاپ كورسەتكەن بولاتىن. قازاق حاندىعىنىڭ 550 جىلدىعىن مەرەكەلەۋدىڭ تاريحي جادىنى جانە پاتريوتيزم رۋحىن قالىپتاستىرۋدا ماڭىزى زور. بۇل كۇن بارلىق قازاقستاندىقتار ءۇشىن، سونىڭ ىشىندە جاس ۇرپاق ءۇشىن ماڭىزدى»، - دەدى ەرىك سۇلتانوۆ.

وبلىس اكىمى وسى مەرەكەلى كۇندەرى ەل پرەزيدەنتى ۇسىنعان «ماڭگىلىك ەل» ۇلتتىق يدەياسىنىڭ ەرەكشە رۋحاني ءمانى زور ەكەنىن اتاپ كورسەتتى.
 «ماڭگىلىك ەل» - بۇل قازىرگى جاعدايدا مەملەكەتتىلىكتى ساقتاۋدىڭ تۇجىرىمداماسى»، - دەپ ءسوزىن ءتۇيدى ءوڭىر باسشىسى.

وبلىس اكىمى پاتريوتيزمدى نىعايتۋعا جانە رۋحاني كەمەلدەنۋگە قوسقان ۇلەسى ءۇشىن 41 سولتۇستىك قازاقستاندىققا «قازاق حاندىعىنا 550 جىل» ەسكەرتكىش بەلگىلەرىن تاپسىردى.  
 مەرەكەلىك شارا كونسەرتتىك باعدارلاماعا ۇلاستى. وبلىستىڭ شىعارماشىل ۇجىمدارى قازاق حاندىعىنىڭ قۇرىلۋ تاريحىنا ارنالعان تەاترلاندىرىلعان قويىلىمدى ۇسىندى.  
 قازاق حاندىعىنىڭ 550 جىلدىعىنا ارنالعان مەرەكەلىك شارالار قازاقستاننىڭ تۇپكىر- تۇپكىرىندە قازان ايىنىڭ سوڭىنا دەيىن جالعاسادى.