ۇلتتىق مۇراعات قازاق حاندىعىنىڭ 550 جىلدىعىنا وراي قۇجاتتار كورمەسىن ۇيىمداستىردى
ءبىرىنشىسى - مۇراعاتتىڭ قۇجاتتارىنان قۇرالعان كورمەسى، ەكىنشىسى - سۋرەتشى- گرافيك، مۇراعات قىزمەتكەرى راقىمجان قاسىمجاننىڭ وسى تاقىرىپتاعى «ۇلى دالا ەلىنىڭ تاريحى» اتتى كورمەسى اشىلدى.
ۇلتتىق مۇراعات ديرەكتورى مارات ابسەمەتوۆتىڭ ايتۋىنشا، ۇلتتىق مۇراعات كورمەسىنە تاريحي قۇجاتتاردىڭ كوشىرمەلەرى قويىلعان. «كورمەگە شەتەل مۇراعاتتارىندا، عىلىمي مەكەمەلەردە تۇرعان ХVI-XX عاسىرلارداعى بىرەگەي مۇراعاتتىق قۇجاتتاردىڭ كوشىرمەلەرىن قويىپ وتىرمىز. اسىرەسە، قازاق حاندىعى كەزەڭىنە قاتىستى قۇجاتتار وتە قۇندى دەرەك بولىپ وتىر»، - دەيدى ول.
ال، سۋرەتشى- گرافيك راقىمجان قاسىمجان بولسا، قازاق باتىرلارىنىڭ، جىلقىلار مەن قازاق سۇلۋلارىنىڭ سۋرەتىن اق- قارا تۇستە كەلبەتتەپ بەرگەن.
«بۇل تاقىرىپتا، ياعني، قازاقتىڭ جاۋگەرشىلىك زامانداعى بەينەلەرىن، باتىرلاردىڭ كەلبەتتەرىن، جاۋىنگەردىڭ ساۋىت- سايماندارىن اق- قارا تۇستە بۇرىننان سالىپ جۇرگەن ەدىم. مىنە، قازاق حاندىعىنىڭ 550 -جىلدىعى اياسىندا كورمە وتكىزۋدىڭ ورايى كەلىپ، 28 سۋرەتىمدى حالىق نازارىنا ۇسىنايىن دەپ شەشتىم. ايتايىن دەگەنىم، مەن وسى سۋرەتتەردى سالاردا، مۋزەيلەرگە بارىپ، قول ونەر شەبەرلەرىنە بارىپ، قىلىشتىڭ قانداي بولاتىنىن، جاۋىنگەردىڭ كيىمدەرى قانداي بولعانىن ابدەن زەرتتەپ الدىم. سوندىقتان، سۋرەتتەرىمدەگى بەينەلەر شىن بەينە، شىن تاريح»، - دەيدى سۋرەتشى راقىمجان قاسىمجان.
ۇلتتىق مۇراعاتتا اشىلعان كورمە قىركۇيەك ايىنىڭ سوڭىنا دەيىن جالعاسادى.
اۆتور: كەنجەكەي توقتامۇرات قىزى