قازاق حاندىعىنىڭ 550 جىلدىعىنا وراي ءتۇسىرىلىپ جاتقان مۋلتفيلمنىڭ پرەمەراسى جەلتوقساندا وتەدى

الماتى. قازاقپارات - قازاق حاندىعىنىڭ 550 جىلدىعىنا وراي ءتۇسىرىلىپ جاتقان تولىق مەتراجدى انيماتسيالىق فيلم جەلتوقسان ايىندا تاۋەلسىزدىك مەيرامى قارساڭىندا كوگىلدىر ەكراننان كورسەتىلەدى.

 مۋلتفيلم ق ر مادەنيەت جانە سپورت مينيسترلىگىنىڭ تاپسىرىسى بويىنشا «ساق» كينوستۋدياسىندا ءتۇسىرىلىپ جاتىر.

فيلمدەگى وقيعا جەلىسى كەرەي مەن جانىبەكتىڭ بالا كەزدەرىنەن باستاپ ەسەيىپ، ەر جەتىپ، ەل باسقارىپ، قازاق حاندىعىن قۇرعانعا دەيىنگى ارالىقتى قامتيدى.

«فيلمنىڭ ماقساتى بالالاردىڭ ءوز تاريحىن تۇسىنۋىنە، كەرەي مەن جانىبەكتەي باتىرلاردىڭ قازاق حاندىعىن قالاي قۇرعانىن ءبىلىپ، سولارعا ەلىكتەۋگە، ءوز ەلىنىڭ پاتريوتى بولىپ وسۋلەرىنە جول اشۋ بولىپ تابىلادى. فيلم جەلىسىندە جانىبەك پەن كەرەيدىڭ ۇستازى بولعان قارت باتىردىڭ ولارعا ساداق اتۋ، قىلىشتاسۋ، اتپەن شابۋ، سول سەكىلدى جاۋىنگەرلىك ونەردىڭ ءتۇرلى تاسىلدەرىن ۇيرەتۋى كەڭىنەن كورسەتىلەدى.

كەيىن ەل باسقارۋدا ءبىلىمنىڭ دە ماڭىزى زور ەكەنىن ۇستازىنان ۇعىنعان كەرەي مەن جانىبەكتىڭ وتىرار قالاسىنا اتتانۋى، وتىرار كىتاپحاناسىن ارالاپ، عۇلاما ۇستازداردان ءتۇرلى دارىستەر الىپ، ەلگە ورالعاندا ءتۇرلى ەرلىكتەرىمەن كوزگە تۇسە باستاۋى دا قامتىلعان. بالالاردىڭ قىزىعۋشىلىعىن ارتتىرۋ ماقساتىندا فيلمدە كەرەي مەن جانىبەكتىڭ بالا كەزدەرىندە باستارىنان وتكەن قىزىقتى وقيعالارى كورسەتىلەدى. ولاردىڭ تاي ۇيرەتەمىز دەپ ءجۇرىپ، قالاي قاراقشىلارعا تاپ بولعاندارى، قارت باتىردىڭ كومەگىمەن قاراقشىلاردى جەڭىپ شىعۋى بالالارعا ءبىر جاعىنان اباي بولۋدى مەڭزەسە، ەكىنشى جاعىنان ەزۋ تارتار بولارى ءسوزسىز»، - دەدى «ساق» كينوستۋدياسىنىىڭ وكىلى ارايلىم ەركىنبايەۆا.

وسى ەپيزودقا ارنايى جازىلعان «قاراقشىلار» ءانىن كاسىبي انشىلەر نۇرلان ابدۋللين، ساكەن مايعازيەۆتەرمەن قاتار نۇرجان تولەنديەۆ («الداراسپان» تەاترى)، بەرىك تۇرسىنبەكوۆتەر («شىمكەنت- شوۋ» تەاترى) ورىندايدى.

پرەمەرانىڭ كورسەتىلىمى جەلتوقسان ايىنداعى تاۋەلسىزدىك كۇنى قارساڭىنا جوسپارلانۋدا.

ايتا كەتۋ كەرەك، اتالعان كينوستۋديا قالىڭ جۇرتشىلىققا «قوشقار مەن تەكە»، «مومىن مەن قاراقشىلار»، «تولاعاي»، «مايماق قاز»، «مۇڭلىق - زارلىق»، «ساپا وليمپياداسى»، «قاناتتى بارىس تۋرالى اڭىز»، «قازاقستان برەندى»، اتتى مۋلتفيلمدەرىمەن جانە «قازاقستان» ۇلتتىق تەلەارناسىنىڭ «ەڭ ۇزدىك جوبا» نوميناتسياسىن جەڭىپ العان بالالارعا ارنالعان «تومپاق تەلەحيكاياسى» سەريالى ارقىلى كەڭىنەن تانىلعان.

اۆتور: گۇلميرا عوسمانالي