قازاق حاندىعىنىڭ 550 جىلدىعىنا ارنالعان موتوشەرۋ قاتىسۋشىلارى قاراعاندىدا بولدى - فوتو
ايگىلى بايكەر دميتري پەترۋحين قاراعاندىلىق سپورتشىلارمەن ءاليا مولداعۇلوۆا اتىنداعى سپورت سالاسىنداعى دارىندى بالالارعا ارنالعان مەكتەپ- ينتەرناتىنىڭ قابىرعاسىندا جۇزدەستى.
«مەن قازاقستان تۋىمەن 150 ەلدە بولىپ، 250 مىڭ شاقىرىم جول ءجۇردىم. بيىل ءبىز ق ر كونستيتۋتسياسىنىڭ 20 جىلدىعى مەن قازاق حاندىعىنىڭ 550 جىلدىعىن اتاپ وتۋدەمىز. قازىرگى قازاقستاننىڭ ءوسىپ- وركەندەۋىنىڭ ارقاسىندا ءبىز وتكەن زاماندارداعى باتىرلارىمىز جايلى كوبىرەك بىلە باستادىق»، - دەدى د. پەترۋحين.
ايتا كەتەيىك، 29 -تامىزدا الماتى قالاسىنان شىققان موتوشەرۋشىلەر 11 -قىركۇيەكتە نەگىزگى مەرەيتويلىق شارالار وتەتىن استانا قالاسىنا كەلسە، 9 -قازاندا نەگىزگى مەرەيتويلىق شارالار جالعاساتىن تاراز قالاسىنا جەتەدى. موتوشەرۋ جول بويى قاراعاندىدان باسقا وسكەمەن، سەمەي، پاۆلودار، كوكشەتاۋ، قوستاناي، اقتوبە، ارال، بايقوڭىر، قىزىلوردا، تۇركىستان، شىمكەنت جانە ت. ب. قالالاردا بولادى.
موتوشەرۋشىلەر ءاربىر ايماقتىڭ باسشىلارىنا قازاق حاندىعىنىڭ 550 جىلدىعىنا ارنالعان لوگوتيپ بەينەلەنگەن تۋدى تابىستاپ، كەزدەسۋلەر وتكىزەدى جانە قازاقستان تاريحىندا ماڭىزى زور تاريحي جەرلەرگە بارادى. شەرۋ شامامەن 40 كۇنگە سوزىلادى.
موتوشەرۋدى «قازاقستان گەوگرافيالىق قوعامىنىڭ» پرەزيدەنتى، الەمگە تانىمال ساياحاتشى د. ي. پەترۋحين باستاماسىمەن قازاقستان رەسپۋبليكاسى مادەنيەت جانە سپورت مينيسترلىگى ۇيىمداستىرىپ وتىر.