قازاق حاندىعىنا 550 جىل: قازاقستاننىڭ باتىس ءوڭىرىن جانە كورشىلەس رەسەي وبلىستارىن قامتيتىن ەكسپەديتسيا جولعا شىقتى - فوتو
قازاق حاندىعىنىڭ 550 جىلدىعى، ۇلى جەڭىستىڭ 70 جىلدىعى، قازاقستان حالقى اسسامبلەياسى مەن اتا زاڭىمىزدىڭ 20 جىلدىعىنا ارنالعان شاراعا قاتىسۋشىلار العاشقى كۇنى تەرەكتى اۋدانى شاعاتاي اۋىلدىق وكرۋگى قىزىلجار ەلدى مەكەنىندەگى جانتورە حاننىڭ زيراتىنا تاعزىم ەتتى.
بۇدان كەيىن اقجايىق اۋدانى بازارتوبە اۋىلىنداعى امانجول ءسالىموۆتىڭ جەكە مۇراجايىنداعى كونە جادىگەرلەرمەن تانىستى. وسى اۋىل ماڭىنداعى ەسىم حاننىڭ بەيىتى دە نازاردان تىس قالعان جوق. اتالعان كىشى ءجۇز حاندارىنىڭ قۇلپىتاستارى كەيىنگى كەزدە تابىلعان بولاتىن. اتىراۋ وبلىسىنداعى سارايشىق قالاشىعىنىڭ ورنىمەن بەلگىلى ولكەتانۋشى ۆياچەسلاۆ افاناسيەۆ تانىستىردى.
ەكسپەديتسيا جەتەكشىسى، ولكەتانۋشى ايبولات قۇرىمبايەۆتىڭ ايتۋىنشا، جاڭاقالا اۋدانى اكىمدىگىنىڭ قولداۋىمەن ورالداعى «عىلىمي زەرتتەۋلەرگە ىقپالداسۋ قورى» جەكە قورى ۇيىمداستىرعان جوبا ماقساتى - ەل تاريحىن زەرتتەۋ، تاريحي تۇلعالارعا تاعزىم ەتىپ، رۋحاني-مادەني قۇندىلىقتاردى قاستەرلەۋ. 10- تامىزعا دەيىن سوزىلاتىن جورىق بارىسىندا توپ مۇشەلەرى سونداي-اق ورتاعاسىرلىق جايىق، اقتوبە- لايەتي، ساراي-باتۋ، ساراي-بەركە قالاشىقتارىنىڭ ورنىندا، تابيعي ەسكەرتكىشتەر بولىپ سانالاتىن ۇلكەن جانە كىشى بوعدا، ۇلاعان تاۋلارىندا، باسقۇنشاق، ەلتون كولدەرىندە، جاڭگىر حاننىڭ جازعى مەكەنجايى تورعىن مەن بوكەي ورداسى اۋدانىنداعى حان ورداسىندا بولماق. بوكەي مەن جاڭگىر حاننىڭ، كۇيشى-كومپوزيتورلار قۇرمانعازى، سەيتەك، داۋلەتكەرەي، مامەن، تۇياقبەردى شامەلوۆتىڭ كەسەنەلەرىنە سوعىپ، قاھارمان-قالا ۆولگوگرادتا كەڭەس وداعىنىڭ باتىرلارى نۇركەن ءابدىروۆ پەن تيموفەي پوزولوتين، قارسىباي سپاتايەۆتىڭ رۋحتارىنا تاعزىم ەتپەك. ۆولگوگراد وبلىسى ەلتون اۋىلىنداعى سماعۇل حانتايەۆتىڭ جەكە مۇراجايىندا بولىپ، ەدىل مەن جايىقتى كەسىپ وتەتىن ەكسپەديتسيا مۇشەلەرى استراحان، اتىراۋ، ورال قالالارىنىڭ تاريحي جەرلەرىن دە ارالاماق.
ەدىل مەن جايىق ارالىعىن زەرتتەۋدى ماقسات تۇتقان ەكسپەديتسيا قازاقستان مەن رەسەيدىڭ عىلىمي جانە مادەني بايلانىستارىن ورنىقتىرۋعا ءوز سەپتىگىن تيگىزەتىن بولادى.