تارازدا ق ر ۆيتسە-پرەمەرى قازاق حاندىعىنىڭ 550 جىلدىعىن مەرەكەلەۋگە نىسانداردىڭ ازىرلىگىن تەكسەردى

تاراز. قازاقپارات - بۇگىن تارازدا ق ر پرەمەر-ءمينيسترىنىڭ ورىنباسارى بەردىبەك ساپاربايەۆ قازاق حاندىعىنىڭ 550 جىلدىعىن مەرەكەلەۋگە ارنالىپ سالىنىپ جاتقان نىسانداردىڭ ازىرلىگىن تەكسەردى.

ب. ساپاربايەۆ كىرەبەرىس ارقانىڭ جوندەلۋىمەن، «اۋليە اتا» اۋەجايىنان شىعا بەرىستەگى ەكى بارەلەف قۇرىلىسىمەن، سونداي-اق قازاق حاندىعىنىڭ 550 جىلدىعىنا ارنالعان مونۋمەنت ورناتۋ، تاۋكە حان كوشەسى بويىنداعى كوپىردى جوندەۋ جۇمىستارىنىڭ بارىسىمەن تانىستى.

بۇدان باسقا، ول تۇڭعىش پرەزيدەنت ساياباعىنىڭ، «تاراز» قوناق ءۇيىنىڭ الدىنداعى، قاراحان ماۆزولەيى مەن اۆتوۆوكزال ماڭىنداعى سكۆەرلەردى اباتتاندىرۋ بارىسىمەن تانىستى.

سونداي-اق، ۆيتسە-پرەمەر «كونە تاراز» تاريحي-مادەني ورتالىعىنىڭ قۇرىلۋىمەن تانىستى، قازاق حاندىعىنىڭ 550 جىلدىعىن مەرەكەلەۋگە دايىندىق بويىنشا ءماجىلىس وتكىزدى.

كۇننىڭ ەكىنشى جارتىسىندا ب. ساپاربايەۆ جۋالى اۋدانىنا بارىپ، تاياۋدا مەملەكەت باسشىسىنىڭ قاتىسۋىمەن وتكەن تەلەكوپىر بارىسىندا ىسكە قوسىلعان «بۋرنوە Solar-1» كۇن ەلەكتر ستانساسىنىڭ جۇمىسىمەن تانىستى. باۋىرجان مومىش ۇلى مۇراجايىن، الەۋمەتتىك سالا نىساندارىن ارالادى.

ەسكە سالساق، بيىل ەلدىڭ بارلىق وڭىرلەرىندە قازاق حاندىعىنىڭ 550 جىلدىعى مەرەكەلەنەدى. 550 جىل بۇرىن تالاس جانە شۋ وزەندەرى اراسىندا كەرەي مەن جانىبەك سۇلتاندار قازاق حاندىعىن قۇرعان جامبىل وبلىسىندا ماڭىزدى شارالار وتەدى. ونىڭ ىشىندە - تەاترلاندىرىلعان كورىنىس، «ماڭگىلىك ەل» رەسپۋبليكالىق اقىندار ايتىسى، «قازاق حاندىعىنىڭ قۇرىلۋى جانە تاريحى» كىتابىنىڭ تۇساۋكەسەرى، «تاراز - عاسىرلار كۋاسى» كورمەسى، قازاق كۇرەسىنەن ق ر پرەزيدەنتىنىڭ جۇلدەسىنە «ەۋرازيا بارىسى» حالىقارالىق تۋرنيرى وتەدى.

بۇدان باسقا، تارازدا «ەجەلگى تاراز» جوباسى جۇزەگە اسىرىلادى. «قازاق حاندىعىنىڭ 550 جىلدىعى» مونۋمەنتى اشىلادى. قىتايلىق شيان قالاسى ارقىلى ۇلى جىبەك جولى باعىتى بويىنشا وتەتىن كەرۋەن ەكسپەديتسياسى قاتىسۋشىلارىنىڭ كەزدەسۋى بولادى.