رەسەي قازاق حاندىعىنىڭ 550 جىلدىعىن نازاردان تىس قالدىرمايدى - ا. كليموۆ
بۇل تۋرالى رەسەي فەدەرالدىق كەڭەستىڭ حالىقارالىق ىستەر بويىنشا كوميتەتى باسشىسىنىڭ ورىنباسارى ا. كليموۆ «نۇر وتان» پارتياسى دەلەگاتسياسىمەن كەزدەسۋ بارىسىندا مالىمدەدى.
بۇل تۋرالى «نۇر وتان» پارتياسىنىڭ باسپا ءسوز قىزمەتى حابارلادى.
«قازاق حاندىعىنىڭ 550 جىلدىعى قازاقستان حالقىنىڭ تاريحىنداعى ماڭىزدى كەزەڭى بولىپ تابىلادى. وسىناۋ ماڭىزدى وقيعانى نازاردان تىس قالدىرماۋ ماسەلەسىن ءبىز سىزدەرمەن بىرلەسىپ ويلاستىرۋىمىز قاجەت»، - دەدى ول.
سونداي- اق، رەسەي پارلامەنتشىلەرى اتاۋلى كۇندەردى مەرەكەلەۋ بويىنشا بىرلەسىپ جۇمىس جاساۋدىڭ قاجەت ەكەنىن جەتكىزدى، ولاردىڭ قاتارىندا جەڭىستىڭ 70 جىلدىعى دا بار.
ەسكە سالا كەتەيىك، 23 - ماۋسىمدا «نۇر وتان» پارتياسى ءتوراعاسىنىڭ ءبىرىنشى ورىنباسارى باۋىرجان بايبەكتىڭ باسشىلىعىمەن «نۇر وتان» پارتياسى دەلەگاتسياسىنىڭ رەسەي فەدەراتسياسىنا ساپارى باستالدى.
رەسمي ساپاردىڭ ءبىرىنشى كۇنىندە باۋىرجان بايبەك رەسەي فەدەراتسياسى فەدەرالدىق جينالىسى مەملەكەتتىك دۋماسىنىڭ ءتوراعاسى سەرگەي نارىشكينمەن كەزدەستى.
ەكىجاقتى كەزدەسۋ بارىسىندا بۇگىنگى تاڭدا ق ر پارلامەنتى سەناتى مەن ر ف فەدەراتسيا كەڭەسىنىڭ، ق ر پارلامەنتى ءماجىلىسى مەن ر ف مەملەكەتتىك دۋماسىنىڭ اراسىندا تىكەلەي ءوزارا ءىس- قيمىلدىڭ ورناتىلعانى اتالىپ ءوتىلدى. تاراپتار ەكى ەل پارلامەنتى اراسىنداعى بايلانىستاردى ءارى قاراي دا دامىتۋعا نيەتتى ەكەندەرىن جەتكىزدى.
سونىمەن قاتار، كەزدەسۋ بارىسىندا ماسكەۋدە «ەدينايا روسسيا» بۇكىل رەسەيلىك ساياسي پارتياسىنىڭ باسشىلىعىمەن ەكى بيلەۋشى پارتيانىڭ اراسىنداعى ءوزارا ءىس- قيمىل مەن ارىپتەستىك تۋرالى كەلىسىمگە قول قويىلدى.