استانادا قازاق حاندىعىنىڭ 550 جىلدىعىنا ارنالعان عىلىمي-پراكتيكالىق كونفەرەنتسيا جۇمىسىن باستادى
بۇل شارانى «نۇر وتان» پارتياسىنىڭ قولداۋىمەن ق ر تۇڭعىش پرەزيدەنتى - ەلباسىنىڭ قورى مەن ب ع م ع ك مەملەكەت تاريحى ينستيتۋتى ۇيىمداستىردى.
قازىرگى تاڭدا تاۋەلسىز دە جاڭا مەملەكەت قۇرۋ بارىسىندا قازاقستاننىڭ دامۋى كەزەڭدەرىنە، جالپى، قوعام وكىلدەرىنىڭ وتان تاريحىنا دەگەن قىزىعۋشىلىقتارى ەرەكشە ارتا تۇسۋدە. تاۋەلسىز قازاقستاننىڭ الەۋمەتتىك-ەكونوميكالىق جانە ساياسي دامۋى، جاڭا قوعامنىڭ قالىپتاسۋى، مەملەكەتىمىزدىڭ وتكەن تاريحىنا تىعىز بايلانىستى، سوندىقتان قازاق مەملەكەتىنىڭ تاريحىن زەرتتەۋ وتاندىق تاريح عىلىمىمەن قاتار حالىقارالىق ساراپشىلار ءۇشىن دە كوكەيتەستى ماسەلەلەردىڭ ءبىرى بولىپ تابىلادى.
ورتالىقتى مەملەكەت - قازاق حاندىعى XV عاسىردىڭ ورتاسىندا قالىپتاسقان. قازاق حاندىعىنىڭ قۇرىلۋى تاۋەلسىز مەملەكەتتىلىكتىڭ ىرگەلى باستاماسى رەتىندە قازاقستان تاريحىندا ءتۇرلى كەزەڭدەردەن تۇرادى. قازاقستان رەسپۋبليكاسىنىڭ پرەزيدەنتى ن. ءا. نازاربايەۆ «تاريح تولقىنىندا» اتتى كىتابىندا «...ورتالىق ازياداعى العاشقى ۇلتتىق سيپاتتاعى مەملەكەت» دەپ اتاپ كورسەتەدى. قازاق حالقى مادەنيەتىن، ءتىلىن جانە جەرىن ءۇشىنشى مىڭجىلدىققا دەيىن، ياعني التى عاسىر بويى وزگەرىسسىز ساقتاعان» دەپ جازعان.
حالىقتىڭ قازاق حاندىعىنان تاۋەلسىز قازاقستانعا دەيىنگى تاريحي جولىن زەرتتەۋ عىلىم ءۇشىن عانا ەمەس، سونىمەن قاتار قوعام ءۇشىن دە ۇلكەن مانگە يە. قازاق حاندىعىنىڭ تاريحىن جاڭاشا وقىپ ءتۇسىنۋ - وسكەلەڭ ۇرپاقتىڭ جاڭا قوعامداعى تاريحي تانىمىن تەرەڭ تۇسىنۋگە مۇمكىندىك بەرەدى.
كونفەرەنتسيا جۇمىسىنىڭ ماقساتى: قازاق حاندىعىنىڭ قۇرىلۋ تاريحىنىڭ وزەكتى ماسەلەلەرىن، قازاق حاندىعىنىڭ ورتالىق ازياداعى العاشقى ۇلتتىق سيپاتتاعى مەملەكەت رەتىندەگى گەنەزيس ماسەلەلەرىن؛ قازاق حاندىعىنىڭ دەرەكناماسى مەن تاريحناماسىن، حاندىق بيلىكتىڭ ءداستۇرلى باسقارۋ ينستيتۋتتارىنىڭ ەۆوليۋتسياسىن، قازاق حاندىعى تاريحىنداعى مەملەكەتتىك نىشانداردى؛ قازاق حاندىعىنىڭ سىرتقى ساياساتى سونىڭ ىشىندە قازاق حاندىعىنىڭ شىعىس جانە ورتالىق ازيا ەلدەرىمەن قارىم-قاتىناستارىن؛ قازاق حاندىعى تاريحىنىڭ وزەكتى ماسەلەلەرىن زەرتتەۋ بويىنشا جاڭا كوزقاراستار مەن تۇجىرىمداردى زەردەلەۋ.
كونفەرەنتسيانىڭ پلەنارلىق وتىرىسىنىڭ مودەراتورى - مەملەكەت تاريحى ينستيتۋتىنىڭ ديرەكتورى، تاريح عىلىمدارىنىڭ دوكتورى، پروفەسسور بۇركىتباي اياعان. كونفەرەنتسيا 2 سەكتسيادا وتكىزىلۋدە. كونفەرەنتسيا جۇمىسىنا ق ر پارلامەنت دەپۋتاتتارى، مەملەكەت جانە قوعام قايراتكەرلەرى، ديپلوماتيالىق كورپۋستىڭ وكىلدەرى، قازاقستان حالقى اسسامبلەياسى وكىلدەرى، شەتەل عالىمدارى، ساياساتتانۋ، الەۋمەتتانۋ، مادەنيەتتانۋ ماماندارى، فيلوسوفتار، جوعارى وقۋ ورىندارىنىڭ وقىتۋشىلارى، مۇراعاتشىلار، كىتاپحانا قىزمەتكەرلەرى، استانا قالاسى مەكتەپتەرىنىڭ مۇعالىمدەرى جانە ب ا ق وكىلدەرى قاتىسۋدا.
كونفەرەنتسيا بارىسىندا «قازاق حاندىعىنا ارنالعان» كىتاپ كورمەسى، گرافيكا- سۋرەت شەبەرى راحىمجان قاسىمجاننىڭ «ەۋرازيا كوشپەلىلەرى» گرافيكالىق كورمەسى ۇسىنىلىپ، «نوعاي ەلى» قوعامدىق بىرلەستىگىنە سالتاناتتى تۇردە سىيلىقتار بەرىلۋى جانە كونتسەرتتىك باعدارلاما جوسپارلانعان.
كونفەرەنتسيا ەرتەڭ ءوز جۇمىسىن ودان ءارى جالعاستىرادى.