قازاق حاندىعىنا 550 جىل: كوكشەتاۋدان «قازاق ەلى - ماڭگىلىك ەل» اۆتوكەرۋەنى ساپارعا شىقتى - فوتو
قازاق حاندىعىنىڭ قۇرىلۋ تاريحىن زەردەلەۋ ماقساتىندا ۇيىمداستىرىلعان بۇل اۆتوكەرۋەنگە زيالى قاۋىم وكىلدەرى، تاريحشىلار، مادەنيەت سالاسىنىڭ قىزمەتكەرلەرى، جاستار جانە جۋرناليستەر ەنىپ وتىر.
اۆتوكەرۋەندى شىعارىپ سالۋ سالتاناتى حان ابىلاي ەسكەرتكىشى باسىنداعى تاعزىم ەتۋ راسىمىمەن باستاۋ الدى. بۇل شاراعا وبلىستىق باسقارمالار مەن دەپارتامەنتتەر باسشىلارى، سوعىس جانە ەڭبەك ارداگەرلەرى، قالانىڭ قۇرمەتتى ازاماتتارى، ساياسي پارتيالار، ەتنومادەني بىرلەستىكتەر، ۇكىمەتتىك ەمەس ۇيىمدار جانە ستۋدەنت جاستار وكىلدەرى قاتىستى.
بۇگىنگى كۇن!..
ەركىندىكتىڭ قۇشاعىندا بەسىگىڭ،
ءار تاڭ سايىن باقىت قاققان ەسىگىن.
ابىلايلاپ!
اتقا قونعان ۇرانمەن،
عاسىرلارعا جاڭعىرىپ تۇر ەسىمىڭ!
اقىننىڭ وسى ءبىر جىر شۋماقتارى ابىلاي الاڭىندا اسقاقتاي جونەلدى. ۇلى حانعا تاعزىم ەتكەن حالىق ەلىنىڭ اماندىعىن ويلاپ، بار عۇمىرىن اتتىڭ ۇستىندە وتكىزگەن داناسىنا تاعزىم ەتىپ، ونىڭ اسقاق بەينەسى سومدالعان ەسكەرتكىشكە گۇل شوقتارىن قويدى. ودان ءارى بۇل سالتاناتتى شارا تاۋەلسىزدىك الاڭىندا جالعاسىپ، حانداردىڭ تويى ءبىزدىڭ ىنتىماعىمىزدىڭ جانە تۇتاستىعىمىزدىڭ ايشىقتى ءبىر كورىنىسىندەي ەستە قالدى. الاڭعا جينالعان قالا تۇرعىندارى شاڭىراعى ەڭسەلەنىپ، بيىكتەپ كەلە جاتقان قازاق ەلىنىڭ تاعى ءبىر اسقاق اسۋعا قادام باسقان ايشىقتى كورىنىسىنە كۋا بولدى.
«بيىل قازاق ەلى ءوزىنىڭ ءتول تاريحىنىڭ تۇڭعيىق تەرەڭىنەن سىر شەرتەتىن - قازاق حاندىعىنىڭ قۇرىلۋىنا بايلانىستى ايشىقتى وقيعانى اتاپ وتەدى. تاسقا جازىلعان تاريح - ەشقاشان وشپەك ەمەس. ال، ءوز تاريحىن بىلگەن ءوزىن دە سىيلايدى، وزگەنى دە قۇرمەتتەيدى. سوندىقتان، بۇل مەرەكە قازاقستان حالقى ءۇشىن عانا ەمەس، بۇكىل تۇركى الەمى ءۇشىن ايتۋلى وقيعا. سەبەبى، قازاق جەرى نە ءبىر وركەنيەتتەر مەن حالىقتاردىڭ ۇلى كوشىنىڭ وشاعى بولدى. بۇگىن دە وسى دالانىڭ بىرەگەي مادەنيەتىن بارشا الەم تانىپ وتىر»، دەدى وبلىس اكىمىنىڭ ورىنباسارى نۇرلان نۇركەنوۆ جينالعاندار الدىندا سويلەگەن سوزىندە.
ول مەملەكەت باسشىسى، ۇلت كوشباسشىسى نۇرسۇلتان ءابىش ۇلى نازاربايەۆتىڭ قازاق مەملەكەتتىلىگىنىڭ بۇكىل تاريحى - بىرىگۋ مەن تۇتاسۋدىڭ ورتاق تاريحى دەگەن ءسوزىن جاڭعىرتىپ، بۇگىنگى كوپ ۇلتتى ەلىمىزدە تاريحقا دەگەن جاڭا كوزقاراستىڭ قالىپتاسقانىن اتاپ كورسەتتى. ال، «قازاق ءتىلى جانە مادەنيەتى» قوعامدىق بىرلەستىگىنىڭ ءتوراعاسى مەيرامبەك قيىقوۆ حانداردىڭ تويى وسكەلەڭ ۇرپاقتى پاتريوتتىق سەزىمگە تاربيەلەۋگە ىقپال ەتىپ، ءوز تاريحىن بىلۋگە دەگەن تانىمدىق قاسيەتتەردى قالىپتاستىراتىندىعىن ءوز سوزىنە ارقاۋ ەتتى.
بۇدان ءارى كونسەرتتىك باعدارلاماعا جالعاسىپ، جۇرت پاتريوتتىق اندەردىڭ كۋا بولدى. ال، حانداردىڭ بيىلعى مەرەيلى جىلىنا ارنالعان اۆتوكەرۋەن وبلىستاردى ارالاۋ ءۇشىن جولعا شىقتى.
الدىمەن اۆتوكەرۋەن 14-18- ءساۋىر ارالىعىندا ەڭبەكشىلدەر، بۇلاندى، اقكول جانە شورتاندى اۋداندارىندا بولىپ، جەرگىلىكتى جۇرتشىلىقپەن كەزدەسۋلەر وتكىزەدى. ودان ءارى ماۋسىم، تامىز ايلارىندا وبلىستىڭ ءتورت باعىتىنداعى اۋداندار مەن قالالاردى ارالاۋدى ماقسات ەتىپ وتىر. وسىلاي بيىلعى قازاق حاندىعىنىڭ 550 جىلدىعىن اتاپ ءوتۋ اياسىندا تاعىلىمدى كەزدەسۋلەر وتكىزەتىن بولادى.
اۆتور: اسلان وسپانوۆ