الماتىداعى سيركتە قازاق حاندىعىنىڭ 550 جىلدىعىنا ارنالعان سپەكتاكل قويىلادى
سيرك ديرەكتورى داۋلەت دوسباتىروۆتىڭ ايتۋىنشا، بۇل قويىلىمدا حورەوگرافيا، تەاتر، بالەت، اكروباتيكا جانە جونگلەر سەكىلدى ءبىرقاتار جانرلار بىرىكتىرىلەتىن بولادى.
«سپەكتاكل قازاق حالقىنىڭ تاريحىنان سىر شەرتەتىن كونە اڭىزعا قۇرىلادى. بۇل ءۇشىن ۇلتتىق كيىمدەر تىگىلەدى جانە ۇلتتىق ماقامدا ارنايى مۋزىكا دا جازىلادى. سوعان وراي، ت. جۇرگەنوۆ اتىنداعى ونەر اكادەمياسى ستۋدەنتتەرى اراسىنان ۆوكاليستەر تاڭداپ الساق پا دەگەن ويدامىز. ولار ۆوكالدىق پارتيالاردى جاندى داۋىسپەن ورىندايتىن بولادى. دەگەنمەن، بۇل ماسەلە ءالى شەشىلگەن جوق. ويتكەنى سيركتە اكۋستيكا جاعى ونشا ەمەس» - دەدى د. دوسباتىروۆ.
بۇدان باسقا، سيرك ديرەكتورى بۇل قويىلىمنىڭ كورەرمەندەردىڭ كوڭىلىنەن شىعاتىندىعىنا سەنىمدى ەكەندىگىن ايتتى.
ايتا كەتەلىك، بۇل شارا ءبىر جاعى «قازاق مەملەكەتتىك سيركى» رەسپۋبليكالىق مەملەكەتتىك كاسىپورنىنىڭ قۇرىلعانىنا 45 جىل تولۋىنا ورايلاستىرىلىپ وتىر. وسىعان بايلانىستى قازىر سيركتە ەكى بولىمنەن تۇراتىن مەرەيتويلىق باعدارلاما ازىرلەنۋدە. ءبىرىنشى بولىمدە سيرك ونەرى سالاسىندا ەڭبەك ەتەتىن شەت ەلدىك بەلگىلى ارتىستەر ونەر كورسەتەتىن بولسا، ەكىنشى ءبولىم جوعارىدا ايتىلىپ وتكەنىندەي قازاق حاندىعىنىڭ 550 جىلدىعىنا ارنالادى.
مەرەيتويلىق باعدارلاما 24- شىلدە كۇنى باستالادى.
اۆتور: جاپپاربەرگەن ايبوتا