قازاق حاندىعىنىڭ 550 جىلدىعىنا وراي ەلىمىزدە 550 شاقىرىمدىق الامان بايگە وتەدى

 استانا. قازاقپارات - قازاق حاندىعىنىڭ 550 جىلدىعىنا وراي ەلىمىزدە 550 شاقىرىمدىق الامان بايگە ۇيىمداستىرىلماق.

 بۇل تۋرالى شىمكەنتتە ق ر ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحاننىڭ توراعالىعىمەن وتكەن «ماڭگىلىك ەل» يدەيالىق تۇعىرىن جۇزەگە اسىرۋداعى ۇلتتىق سپورتتىڭ ءرولى» اتتى سەمينار- كەڭەستە بەلگىلى بولدى.

 كەشەگى قازىنالى قاريالارىمىزدان قالعان باي مۇرانى ساقتاپ قالۋ، ناسيحاتتاۋ قاۋىمداستىقتىڭ باستى جوسپارلارىنىڭ ءبىرى بولىپ تابىلاتىندىعىن ايتقان ب. تىلەۋحان قازاق حاندىعىنىڭ 550 جىلدىعىنا وراي ەلىمىزدە 550 شاقىرىمدىق الامان بايگە ۇيىمداستىرىلاتىنىن ايتتى، دەپ حابارلايدى و ق و اكىمىنىڭ باسپا ءسوز قىزمەتىنەن.

 سونداي- اق ق ر ۇلتتىق سپورت تۇرلەرى قاۋىمداستىعىنىڭ پرەزيدەنتى بيىلعى ايتۋلى داتالاردا - «قازاق حاندىعىنىڭ 550 جىلدىق مەرەيتويى» مەن «قازاقستان حالقى اسسامبلەياسىنىڭ 20 جىلدىعى»، «قازاقستان كونستيتۋتسياسىنىڭ 20 جىلدىق مەرەيتويى» جانە «استانا» كۇنىندە ۇلتتىق سپورت تۇرلەرىنەن جارىستار ۇيىمداستىرۋ كەرەكتىگىن تىلگە تيەك ەتتى.

 قاۋىمداستىق باسشىسىنىڭ ايتۋىنشا، سپورت ۇيىمى اتادان بالاعا ميراس بولعان ۇلتتىق سپورت تۇرلەرىنىڭ دامۋىن كوزدەيدى. ياعني عاسىرلار قويناۋىنان تامىر تارتقان ۇلتتىق ويىندارىمىزدىڭ شىعۋ تاريحىن جازىپ قالدىرعان ەتنوگراف، دەرەكتانۋشى، تاريحشى عالىمداردىڭ ەڭبەكتەرىن ناسيحاتتاپ، كوپشىلىك حالىققا جەتكىزۋ باستى مۇرات.

وسى سالادا قازاقتىڭ كورنەكتى عالىمى، ارحەولوگيا جانە ەتنوگرافيا عىلىمدارىنىڭ نەگىزىن قالاۋشى الكەي مارعۇلاننىڭ «سايات قۇستار» اتتى قۇسبەلگىلەرگە ارنالعان ەڭبەگى جانە ەتنوگراف، زەرتتەۋشى بەكەن قايرات ۇلىنىڭ «قازاقتىڭ اتبەگىلىك ونەرى» اتتى ەڭبەگى جارىققا شىعارىلىپ، سپورت مەكتەپتەرى مەن كلۋبتارىنا تاراتىلدى، دەپ اتاپ ءوتتى ب. تىلەۋحان.