قازاق حاندىعىنىڭ 550 جىلدىعىنا ارنالعان شارالارعا 23 ميلليارد تەڭگە جۇمسالادى

استانا. قازاقپارات - قازاق حاندىعىنىڭ 550 جىلدىعىنا بايلانىستى شارالارعا 22,79 ميللياردتان استام قارجى جۇمسالادى، - دەپ حابارلايدى Tengrinews.kz ءتىلشىسى. بۇل تۋرالى «ادىلەت» جۇيەسىندە جاريالانعان 2015-جىلى قازاق حاندىعىنىڭ 550 جىلدىق مەرەيتويى دايىندىعى مەن ونى وتكىزۋ جونىندەگى ءىس-شارالار جوسپارىندا ايتىلدى. ايتا كەتەيىك، تىزىمدەگى شارالاردىڭ شىعىن سوماسى كورسەتىلمەگەن نەمەسە انىقتالماعان.

قارجىنىڭ باسىم بولىگى تارازدا وتەتىن مادەني جانە سپورتتىق شارالارعا جۇمسالادى. وسى ماقساتتارعا 13,48 ميلليارد تەڭگەدەن استام قارجى جۇمسالۋى مۇمكىن. ايتا كەتەيىك، ونىڭ شىعىندارى ءالى دە ناقتىلانادى. ماسەلەن، بۇل ءۇشىن بيۋجەتتىك سايكەس باعدارلامالاردىڭ قارجىسى قايتا ءبولىنۋى ىقتيمال نەمەسە ۇكىمەت رەزەرۆىندەگى اقشا بولىنەدى نە دەمەۋشىلىك قارجى تارتىلۋى مۇمكىن. ەكىنشى ورىندا «كونە تاراز» جوباسى تۇر (شامامەن التى ميلليارد تەڭگە). قارجى ارحەولوگيلىق زەرتتەۋلەرگە، ەسكەرتكىشتەردى قايتا قالپىنا كەلتىرۋگە، جەردى تارتىپ الۋعا، ينفراقۇرىلىمدى دامىتۋ مەن قۇرىلىسقا جۇمسالادى.

ميلليارد تەڭگەدەن استام قاراجات «قازاق ەلى» 10 سەريالى تاريحي-درامالىق تەلەحيكاياسىن شىعارۋعا كەتەدى. ايتا كەتەيىك، وسىعان دەيىن تەلەسەريالدىڭ 20 سەرياسى شىعادى دەلىندى. مۇنىمەن قاتار، 375 ميلليون تەڭگە «قازاق ەلى» انيماتسيالىق فيلمىنە جۇمسالادى، تاعى دا 250 ميلليون تەڭگە قازاق حاندىعىنىڭ 550 جىلدىعىنا وراي شىعاتىن دەرەكتى فيلمگە جانە شامامەن 106,6 ميلليون تەڭگە ءىلياس ەسەنبەرليننىڭ «كوشپەندىلەر» تريلوگياسىن باسىپ شىعارۋعا جۇمسالاتىنى بەلگىلى بولدى.

مۇنىمەن قاتار، 506,8 ميلليون تەڭگە تاراز قالاسىندا قازاق حاندىعىنىڭ 550 جىلدىعىنا ارنالعان تەاترلاندىرىلعان كورىنىس قويۋعا جوسپارلانىپ وتىر. قويىلىم 2015-جىلى قىركۇيەك ايىندا دايىن بولادى. تاعى دا 501,8 ميلليون مەرەيتويعا ارنالعان مونۋمەنتتى جاساۋعا جۇمسالماق. «ۇلى كوش» كارتيناسىن جاساۋعا مول قارجى بولىنەدى. بۇل ماقساتقا 150 ميلليون تەڭگە بولىنگەن. 100 ميلليون تەڭگە «تامعالى» تاريحي-مادەني جانە تابيعي قورىق-مۇراجايىنىڭ قۇرىلىسىنا كەتەدى.

قالعان سوما ءجۇز ميلليون تەڭگەلىك شىعىن شىعاتىن ءىس-شارالارعا جۇمسالادى. اتاپ ايتقاندا، 68 ميلليونعا جۋىق قارجى «كەرەي-جانىبەك»، «قازاق ەلى» سپەكتاكلدەرى مەن «قازاق حاندىعى» بالەتىنىڭ قويىلىمىنا بولىنەدى. تاعى دا 20,4 ميلليون تەڭگە قوجا احمەت ياساۋي كەسەنەسىن قالپىنا كەلتىرۋ مەن وقشاۋلاۋ جۇمىستارىن جۇرگىزۋگە جۇمسالماق. ايتا كەتەيىك، تاريحشىلاردىڭ ماتلىمەتىنشە، قازاق حاندىعى 1465-جىلى قۇرىلعان. 550 جىلدىق مەرەيتوي 2015-جىلى تويلانادى دەپ جوسپارلانعان.