قازاق حاندىعىنىڭ 550 جىلدىعىنا وراي اسكەريلەردىڭ 20 كومانداسى جەكپە- جەكتەن سايىسادى
اتالعان ءدۇبىرلى دودانى ۇيىمداستىرۋعا ەلىمىزدىڭ مادەنيەت جانە سپورت مينيسترلىگى سپورت جانە دەنە شىنىقتىرۋ كوميتەتىنىڭ كۇنتىزبەلىك جوسپارىنا ساي قازاقستان رەسپۋبليكاسى ۇلتتىق ۇلانى مەن قويان- قولتىق ۇرىستان بۇكىلقازاقستاندىق اسسوتسياتسياسى ۇيىتقى بولىپ وتىر.
حالىقارالىق تۋرنيرگە ەلىمىزدىڭ قارۋلى كۇشتەرىنىڭ، وزگە دە اسكەري قۇرىلىمدارى مەن كۇش- قۋات ورگاندارىنىڭ جانە وسى سپورت تۇرىنەن وبلىستىق فەدەراتسيالاردان 20 دان اسا قۇراما كوماندا، سونداي- اق رەسەي فەدەراتسياسى مەن قىزعىز رەسپۋبليكاسىنان 2 سپورت كومانداسى قاتىسادى.
مىقتىلار سايىسقا تۇسكەن دودادا ەل نامىسىن جەكپە- جەكتەن الەم چەمپيونى ايبەك حىرىحباي (2012 ج. ) ، كيكبوكسينگتەن ازيا چەمپيونى مەدەت سامەتايەۆ (2015 ج. ) ، كيكبوكسينگتەن وتكەن « قىزىلجار» تۋرنيرىنىڭ چەمپيونى الكەن تولەگەنوۆ (2010 ج. ) جانە باسقا دا سايىپقىران سپورتشىلار قورعايتىن بولادى.
جارىستىڭ سالتاناتتى اشىلۋى 15 قىركۇيەك كۇنى «داۋلەت» سپورت كەشەنىندە وتەدى.
دودانىڭ اشىلۋ راسىمىنە كۇش- قۋات ورگاندارى باسشىلارى، پارلامەنت دەپۋتاتتارى، سپورت كوميتەتتەرىنىڭ جەتەكشىلەرى، سونداي- اق جەكپە- جەك تۇرلەرىنەن رەسپۋبليكالىق سپورت ۇيىمدارىنىڭ جانە بۇقارالىق اقپارات قۇرالدارىنىڭ وكىلدەرى شاقىرىلعان.
16 - قىركۇيەك كۇنى ءار ءتۇرلى سالماق دارەجەسى بويىنشا جەڭىمپاز اتانعانداردى ماراپاتتاۋ ءراسىمى وتەدى.