تۇران جولبارىسىن قايتا جەرسىندىرۋ ءۇشىن بالقاش جاعاسىنا 51 قۇلان جىبەرىلەدى
بۇل تۋرالى مينيسترلىكتىڭ 2024-2026 -جىلدارعا ارنالعان بيۋدجەت جوباسىندا ايتىلعان.
«تۇران جولبارىسىن رەينترودۋكتسيالاۋ ءۇشىن جاعداي جاساۋ جانە ۇلىتاۋ تاۋلى القابىنىڭ تابيعي جانە تاريحي- مادەني وبەكتىلەرىن ساقتاۋعا جاردەم كورسەتۋ» دەپ اتالاتىن بيۋدجەت باعدارلاماسىنىڭ اياسىندا بالقاش ماڭىنان جويىلىپ كەتكەن تۇران جولبارىسىنىڭ پوپۋلياتسياسىن قالپىنا كەلتىرۋ كوزدەلىپ وتىر.
«بيۋدجەتتىك باعدارلامانىڭ تۇپكىلىكتى ناتيجەسى - قۇلاندى «ىلە- بالقاش» مەملەكەتتىك تابيعي قورىعىنىڭ اۋماعىندا قايتا جەرسىندىرۋ. وسىلايشا 2024 -جىلى - 17, 2025 -جىلى – 17، 2026 -جىلى - 17 قۇلان جىبەرىلەدى» ، - دەپ جازىلعان باعدارلاما جوباسىندا.
قۇجاتتان 2022 -جىلى اتالمىش قورىققا 13 قۇلاننىڭ جىبەرىلگەنىن كورۋگە بولادى.
بيۋدجەتتىك باعدارلاما اياسىندا جوباعا گرانت ەسەبىنەن 2024 -جىلى - 159 ميلليون 800 مىڭ تەڭگە، 2025 -جىلى - 80 ميلليون 110 مىڭ تەڭگە، 2026 -جىلى - 80 ميلليون تەڭگە قاراستىرىلعان.
سونداي- اق گرانتتى بىرلەسىپ قارجىلاندىرۋ ءۇشىن رەسپۋبليكالىق بيۋدجەتتەن 2024 -جىلى - 383 ميلليون 10 مىڭ تەڭگە، 2025 -جىلى - 329 ميلليون 566 مىڭ تەڭگە، 2026 -جىلى - 129 ميلليون 581 مىڭ تەڭگە جۇمسالماق.