بۇل تۋرالى ورتالىق سايلاۋ كوميسسياسى ءتوراعاسىنىڭ ورىنباسارى كونستانتين پەتروۆ ايتتى، دەپ حابارلايدى قازاقپارات ءتىلشىسى.
«قازاقستان رەسپۋبليكاسىنىڭ 51 مەملەكەتتەگى وكىلدىكتەرى جانىنان ۋچاسكەلەر قۇرىلادى. بۇل ۋچاسكەلەردە تىزىمگە سايلاۋ قۇقىعى بار، ءتيىستى مەملەكەتتە تۇراتىن نەمەسە ۇزاق مەرزىمدى شەتەلدىك ءىس ساپاردا جۇرگەن جانە ق ر ازاماتىنىڭ جارامدى پاسپورتى بار بارلىق ازاماتتار ەنگىزىلەدى»، - دەدى كونستانتين پەتروۆ ورتالىق سايلاۋ كوميسسياسىندا وتكەن وتىرىستا.
شەت مەملەكەتتەرگە جەكە شاقىرۋ بويىنشا، قىزمەتتىك، ىسكەرلىك جانە تۋريستىك ساپارعا بارعان قازاقستاندىقتار ۋچاسكەلىك كوميسسياعا جۇگىنۋى كەرەك جانە ق ر ازاماتىنىڭ جارامدى پاسپورتىن كورسەتۋى ءتيىس.
«ق ر سىرتقى ىستەر مينيسترلىگى شەتەلدەگى ازاماتتاردىڭ تىزىمىنە ەنگىزۋ ءۇشىن ق ر اۋماعىنان تىس ورنالاسقان ۋچاسكەلىك كوميسسيالارعا كومەك كورسەتەدى. جالپى، جەرگىلىكتى اتقارۋشى ورگاندار رەفەرەندۋم كوميسسيالارىمەن بىرلەسىپ، رەفەرەندۋم وتەتىن كۇنى ۋچاسكەگە كەلگەن ازامات ءوزىن تىزىمنەن تاۋىپ، كونستيتۋتسيادا كەپىلدىك بەرىلگەن قۇقىعىن كەدەرگىسىز ىسكە اسىرۋى ءۇشىن بارلىق شارالاردى قابىلداۋى ءتيىس»، - دەدى ك. پەتروۆ.
ايتا كەتەيىك، ورتالىق سايلاۋ كوميسسياسى 5- ماۋسىمدا وتەتىن رەسپۋبليكالىق رەفەرەندۋم كوميسسيالارىنىڭ قىزمەتى تۋرالى قاۋلى قابىلدادى. ۇگىتتەۋ جۇمىستارى رەفەرەندۋم تاعايىندالعاننان ساتتە باستالىپ، داۋىس بەرۋدىڭ اياقتالۋىنا ءبىر كۇن قالعاندا، ياعني 2022-جىلى 4- ماۋسىمدا ساعات 00:00 دە اياقتالادى.
رەفەرەندۋم كەزىندە ەپيداحۋال ناشارلاعان جاعدايدا Ashyq جوباسى قولدانىلادى.