بۇل تۋرالى بۇگىن ۇكىمەت وتىرىسىندا ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى قازاقپارات ءتىلشىسى.
قازىرگى قولدانىستاعى جۇيە زەينەتكەرلەردىڭ ءۇش بۋىنىن قامتيدى. قاراستىرىلعان وزگەرىستەردە 1998 -جىلعا دەيىن جانە 1998 -جىلدان كەيىن زەينەتكە شىققان ازاماتتار زەينەتاقى تولەمدەرىنىڭ نەگىزگى بولىگىن مەملەكەتتەن، ال بولاشاق زەينەتكەرلەر جيناقتاۋشى زەينەتاقى جۇيەسىنەن الاتىن بولادى. وسى ماقساتتا بۇگىنگى زەينەتكەرلەر ءۇشىن بازالىق جانە ەڭبەك زەينەتاقىلارىنىڭ مولشەرىن ەسەپتەۋ پارامەترلەرى وزگەرەدى. بۇل وزگەرىس اتالعان زەينەتاقىلاردىڭ مولشەرىن كوبەيتۋ ماقساتىندا قاراستىرىلىپ وتىر. ال بولاشاق زەينەتكەرلەر ءۇشىن 2024 -جىلدىڭ 1- قاڭتارىنان باستاپ جۇمىس بەرۋشىلەر تاراپىنىن قوسىمشا زەينەتاقى جارنالارى ەنگىزىلەتىن بولادى»، - دەدى مينيستر.
سونىمەن قاتار ول جاڭا الەۋمەتتىك كودەكستە سالىمشىلاردىڭ ءوز اكتيۆتەرىن باسقارۋ جونىندەگى قۇقىقتارىن كەڭەيتۋ بويىنشا وزگەرىستەر ەنگىزىلگەنىن اتاپ ءوتتى.
«ەندى ازاماتتار بەلگىلەنگەن جەتكىلىكتىك شەگىنەن اسقان زەينەتاقى جيناقتارىن تەك ەمدەلۋگە جانە تۇرعىن ءۇي ساتىپ الۋعا جۇمساي الادى. سونداي- اق سالىمشىلارعا زەينەتاقى جيناقتارىنىڭ 50 پايىزدان اسپايتىن بولىگىن اكتيۆتەردى باسقارۋ كومپانياسىنا بەرۋ جانە مۇنداي كومپانيانى وزدەرى تاڭداۋ قۇقىعى بەرىلەدى. بۇل رەتتە مەملەكەت زەينەتاقى جيناقتارىنىڭ ساقتالۋىنا كەپىلدىكتى جيناقتىڭ ۇلتتىق بانك باسقاراتىن بولىگىنە عانا بەرەتىنىن اتاپ وتكەن ءجون»، - دەدى تامارا دۇيسەنوۆا.
ال جەكە باسقارۋعا بەرىلەتىن زەينەتاقى جيناقتارىنىڭ ساقتالۋىنا جانە ونىڭ تابىستىلىعىنا سالىمشى تاڭداپ العان كومپانيا جاۋاپتى بولادى. سوندىقتان ءاربىر سالىمشى باسقارۋ جونىندەگى جەكە كومپانيانى تاڭداعان كەزدە ىقتيمال تاۋەكەلدەردى مۇقيات ەسكەرۋى ءتيىس بولادى.
بۇعان دەيىن زەينەتاقى جيناعىنىڭ 50 پايىزىن جەكە كومپانيالارعا اۋدارۋ مۇمكىندىگى جاسالاتىندىعى تۋرالى حابارلادىق. جۋىردا بۇل قۇجاتتى پارلامەنت قارايتىن بولادى.
اۆتور
مارلان جيەمباي