شىعىس قازاقستاندا شەكارالىق اۋداندى دامىتۋ ءۇشىن بيىل 50 دەن استام شارا جۇزەگە اسادى
بۇل تۋرالى اۋدان اكىمى دۋلات قاجانوۆ «مەملەكەت باسشىسىنىڭ تاپسىرمالارى شەڭبەرىندە زايسان اۋدانىنىڭ الەۋمەتتىك- ەكونوميكالىق دامۋى» تاقىرىبىندا وتكەن باسپا ءسوز كونفەرەنتسياسىندا ايتتى.
«وبلىس اكىمى دانيال احمەتوۆتىڭ تاپسىرماسىمەن شەكارالىق اۋداندى كەشەندى دامىتۋدىڭ ارنايى باعدارلاماسى قابىلدانعان. 5 جىلدىڭ ىشىندە بارلىعى 19,5 ميلليارد تەڭگە بولىنەدى دەپ كوزدەلىپ وتىر. ونىڭ ىشىندە 2021-2022 -جىلدارى 6,9 ميلليارد تەڭگەگە جۇمىستار اتقارىلدى. جالپى وسى جىلى 3,7 ميلليارد تەڭگەگە 52 شارا ءوز مارەسىنە جەتپەك. بۇگىنگى تاڭدا 22 ءسى اياقتالىپ، 30 ى ورىندالۋ ساتىسىندا»، - دەدى ول.
باعدارلاما اياسىندا جەكە تۇرعىن ۇيلەرگە ارنالعان ەلەكتر، گاز، سۋ جۇيەلەرى ينفراقۇرىلىمدارىن سالۋ، 300 ورىندىق مەكتەپ قۇرىلىسى، سۋ جەلىلەرىن جوندەۋ جۇمىستارى، اۋىلداردى اباتتاندىرۋ، 5 ءبىلىم، 1 دەنساۋلىق ساقتاۋ، 1 مادەنيەت سالاسىنداعى عيماراتتى كۇردەلى جانە اعىمداعى جوندەۋدەن وتكىزۋ جۇمىستارى اتقارىلىپ جاتىر.
سونداي- اق «اۋىل - ەل بەسىگى» باعدارلاماسى اياسىندا كەڭساي، باقاسۋ، جارسۋ، قاراتال، ۇلكەن قاراتال جانە كوگەداي اۋىلدارىنىڭ كوشەلەرى جوندەۋدەن ءوتتى.
بۇل ماقساتتا 350 ميلليون تەڭگە بولىنگەن.
«حالىقتىڭ باسپانا ماسەلەسىن شەشۋ جۇمىستارى جالعاسۋدا. بيىل 9812 شارشى مەتر تۇرعىن پايدالانۋعا بەرىلەدى. «ءبىرقاباتتى شىعىس» باعدارلاماسى شەڭبەرىندە از قامتىلعان جانە كوپبالالى وتباسىلار ءۇشىن ەكىپاتەرلى 35 ءۇيدىڭ قۇرىلىسىن جۇرگىزۋ ءۇشىن جەكە ينۆەستورلارمەن كەلىسىمشارت جاساستىق. قازىر ولارعا ءتيىستى جەر تەلىمدەرى بەرىلدى»، - دەيدى دۋلات قاجانوۆ.