تۇركىستان وبلىسىندا 50-دەن استام پاتەردى توناعان كۇدىكتى ۇستالدى
ول تۇرعىن ۇيلەردىڭ تەرەزەسىن بۇزىپ كىرىپ، بولمەلەردەگى اقشا مەن التىن بۇيىمداردى ۇرلاپ كەلگەن. ال ولجاسىن شىمكەنت قالاسىنداعى لومباردتارعا وتكىزىپ، اقشانى ءوز قاجەتتىلىگىنە جۇمساپ وتىرعان.
«بۇل قىلمىستى اشۋ ماقساتىندا، كريمينالدىق پوليتسيا باسقارماسىنىڭ تاجىريبەلى جەدەل ۋاكىلدەرى مەن قازىعۇرتتىق پوليتسەيلەردەن جەدەل- تەرگەۋ توبىن قۇردىق. پاتەر ۇرىسىن ۇستاۋ باعىتىندا جان-جاقتى ىزدەستىرۋ شارالارى ىسكە اسىرىلدى. قىلمىستى اشۋ باعىتىنداعى ارنايى ءىس- شارالار جۇرگىزىلدى. ناتيجەسىندە، كۇدىكتىنىڭ جەكە باسى انىقتالدى. ول مۇنىڭ الدىن دا پاتەر ۇرلىعىمەن سوتتالعان شىمكەنت قالاسىنىڭ تۇرعىنى بولىپ شىقتى»، - دەدى تۇركىستان وبلىسى پوليتسيا دەپارتامەنتى باستىعىنىڭ ورىنباسارى قۇرمانبەك ساحوۆ.
تەرگەۋ بارىسىندا كۇدىكتىنىڭ سوڭعى ءۇش جىل ىشىندە 50-دەن استام ۇيگە ۇرلىققا تۇسكەنى انىقتالعان. ءوزى دە قازىعۇرت، كەلەس، سارىاعاش، ورداباسى اۋداندارىندا جاساعان ۇرلىقتارىن مويىنداعان.
«قازىرگى تاڭدا اتالعان جايتتار بويىنشا سوتقا دەيىنگى تەرگەۋ امالدارى جۇرگىزىلۋدە. كۇدىكتى قاماۋعا الىندى. ايعاقتى زات رەتىندە ۇرلانعان التىنداردىڭ ءبىر بولىگى تاركىلەنىپ، زاڭدى يەلەرىنە قايتارىلدى»، - دەدى قۇرمانبەك ساحوۆ.
اۆتور: قايرات زاينيشەۆ