ۇكىمەت ەرەۋىلگە شىققانداردىڭ تالابىن ورىنداپ، گازدىڭ باعاسىن 1 ليتر ءۇشىن 50 تەڭگەگە دەيىن ءتۇسىرۋ تۋرالى ماسەلەنى قاراستىرىپ وتىر ما؟ ق ر ەنەرگەتيكا مينيسترىنە ورتالىق كوممۋنيكاتسيالار قىزمەتىندە وتكەن بريفينگىدە وسىنداي سۇراق قويىلدى.
«كوتەرمە باعاسى بار، تاسىمال جانە ساقتاۋ شىعىندارى بار. وسىنىڭ ءبارىن قاراپ جانارماي ستانسالارىنداعى سۇيىتىلعان گازدىڭ وزىندىك قۇنىن ەسەپتەپ شىعارامىز. قازىرگى تاڭدا ونىڭ مولشەرى 80 تەڭگەنىڭ كولەمىندە قالىپتاسىپ وتىر. سوندا جانارماي قۇيۋ ستانسالارىنا قالاتىن مارجا 40 تەڭگەگە دەيىن، ياعني، 50 پايىزعا جەتكەن بولاتىن. تۇندە ۆيتسە- مينيستر اقتاۋ قالاسىنا ۇشىپ باردى. ول سول جاقتا جانارماي ستانسالارىنىڭ يەلەرىن كەزدەستى. مۇنى بيزنەستىڭ الەۋمەتتىك جاۋاپكەرشىلىگى دەپ ايتىپ وتىرمىز. ياعني، احۋال باسقا شەشىمدى قاجەت ەتىپ وتىرسا، ولارعا دا ءوز تابەتتەرىن شەكتەۋ قاجەت. مەنىڭ قازىر ءسوزۋارلىققا سالىنعىم كەلىپ وتىرعان جوق. ءبىراق جاعدايدى وسىلاي كورىپ وتىرمىن»، - دەدى ماعزۇم مىرزاعاليەۆ.
سونداي- اق ۆەدومستۆو باسشىسى ءدال قازىر گاز باعاسىن 50 تەڭگەگە دەيىن ءتۇسىرۋدىڭ مۇمكىندىگىن كورىپ تۇرماعانىن ايتتى.
«بۇل سۇراققا بىرنەشە رەت جاۋاپ بەردىم. ءوندىرىستىڭ وزىندىك قۇنى بار. بار بولعانى وسى عانا. جاڭاوزەندەگى گازدى قايتا وڭدەۋ زاۋىتىندا دا ءدال سونداي قالا تۇرعىندارى جۇمىس ىستەپ ءجۇر. ءتۇسىنىپ وتىرسىز با؟ گاز ءوندىرىسىنىڭ وزىندىك قۇنى شامامەن 100 مىڭ ەكەنىن، بۇل حالىق قالاپ وتىرعان 50-60 تەڭگەدەن كوپ ەكەنىن ەسكەرسەك، الدىمىزدا ماسەلەنى شەشۋدىڭ ەكى جولى عانا بار. نە ۇنەمى تاپشىلىقتا كۇن كەشىپ، ءبىر كۇنى زاۋىتتارىمىز توقتايدى، نە وسىنداي اسا جاعىمدى ەمەس شەشىم قابىلدانادى. قازىرگى احۋالدى وبەكتيۆتى زەردەلەسەك، وسىلاي بولىپ وتىر. نارىق زاڭىن ەشكىم الىپ تاستاعان جوق. بۇگىنگى تاڭدا ءبىز حالىقتىڭ ول تالابىن ورىنداۋدىڭ مۇمكىندىگىن كورىپ تۇرعان جوقپىز»، - دەدى مينيستر.
«سۇيىتىلعان مۇناي گازىن تۇتىنۋدىڭ كولەمى 2021 -جىلى كۇشەيدى. سەبەبى 2019 -جىلدان بەرى سۇيىتىلعان گازعا وتكىزىلگەن اۆتوكولىكتەر سانى بيىل شامامەن 2 ەسە ءوستى. الەمدىك تاجىريبەدە سۇيىتىلعان گازدىڭ باعاسى مۇناي باعاسىمەن ءوزارا بايلانىستى. بەنزين باعاسىنىڭ % 70 پايىزىن قۇرايدى. مىسالى رەتىندە، اي-92 ماركالى بەنزيننىڭ قۇنى ليترىنە 182 تەڭگە بولعان كەزدە گازدىڭ نارىقتىق قۇنى شامامەن ليترىنە 127 تەڭگەنى قۇراۋى ءتيىس»، - دەدى مينيستر.
اۆتور: ەسىمجان ناقتىباي