وڭتۇستىك قازاقستاندا قارا الا سيىرلار تاۋلىگىنە 50 ليترگە دەيىن ءسۇت بەرەدى
شارۋاشىلىقتا 400 گە جۋىق گولشتين تۇقىمدى سيىر بار. سەرىكتەستىك الداعى 5 جىلدا مال باسىن 2 مىڭعا جەتكىزبەك. يندۋستريالاندىرۋ كارتاسىنا ەنگەن جوبانىڭ جالپى قۇنى 1 ميلليارد 880 ميلليون تەڭگەگە جۋىقتايدى.
كانادانىڭ قارا الا سيىرلارى جەگەن جەمىنە قاراي ءسۇتتى دە مول بەرەدى ەكەن. سوندىقتان ولارعا سەگىز ءتۇرلى قوسپاسى بار ءشوپ شاشىلادى. ءتىپتى ءاربىر سيىرعا 600 گرام قانت تا قوسىلادى. ءتاتتى ءسۇتتىڭ مايلىلىعىن ارتتىرادى. گولشتين تۇقىمداس ءبىر سيىردان جىلىنا 6 مىڭ ليتردەن استام ءسۇت ساۋىلادى.
ءسۇتتى الا سيىرلار جايىلىمعا شىعارىلمايدى. سوندىقتان ولارعا قورادا بارلىق جاعداي جاسالعان. ارنايى جەم- ءشوپ بەرىلەدى. سۋ قۇياتىن ىدىستار دا بار. ءتىپتى اينالمالى شەتكالارعا سيىرلار جاقىنداپ قاسىنا دا الادى. ەگەر اۋا رايى قاتتى ىسىپ كەتەتىن بولسا قوندىرعىلار سۋ بۇركىپ، ىشتە ىلعالدى اۋا پايدا بولادى.
قوراداعى ءاربىر سيىردىڭ اياعىنا ارنايى ساقينا ورناتىلعان. قوندىرعى ءىرى قارانىڭ جاي- كۇيىن، جاسىن، ءتىپتى ءاربىر باسقان قادامىن باقىلاپ، كومپيۋتەرگە اقپارات بەرىپ وتىرادى. مال سىرقاتتانىپ نە ءسۇتى سۇيىلىپ كەتسە جەكە باقىلاۋعا الىنادى. ءتىپتى قوجالىقتاعى بىلىكتى مال دارىگەرلەرى ءشوپ جەي الماي قالعان سيىرلارعا وزدەرى وپەراتسيا جاساعان. اسىلتۇقىمدى بولعانىمەن نازىك. سوندىقتان كوپ كۇتىمدى قاجەت ەتەدى دەپ وتىر شارۋاشىلىقتاعىلار.
عاني سۇلتانوۆ، «قازىنا جەر» ج ش س كەشەنىنىڭ مەڭگەرۋشىسى:
- دارىگەرلىك تەرمينمەن ايتقاندا «ەكزوتيكالىق اۋرۋلار» دەگەن بولادى. سول ەكزوتيكالىق اۋرۋدىڭ ءبىرى اسقازاننىڭ جالبىرشاق قارنى، مال تولدەپ بولعان سوڭ 1-2 ساعات ىشىندە وڭ جاعىنان سول جاعىنا اۋىپ كەتەدى ەكەن. ءونىمدى وتە كوپ بەرەتىن مالدار سونداي. ءبىزدىڭ جەرگىلىكتى مالداردا كەزدەسپەيدى. وپەراتسيا جاساپ جالبىرشاق قارنىن تىگىپ قويدىق، ول قايتا مال بولىپ كەتتى.
فەرما زاماناۋي قوندىرعىمەن جابدىقتالعان. توقتىڭ كۇشىمەن اينالىپ تۇراتىن قۇرال ءبىر مەزەتتە 28 باس ءىرى قارانى ءوزى ساۋىپ الادى. ءار انالىق باستىڭ كۇنىنە قانشا ليتر ءسۇت بەرگەنىن دە كورسەتەدى. رايگۇل نۇرىمبەتوۆا بۇرىن بۇل جۇمىستىڭ ءبارىن قولمەن اتقاراتىن. تالاي رەت اساۋ سيىردى ۇيرەتەم دەپ ءجۇرىپ جاراقات تا العان. ەندى سوڭعى ۇلگىدەگى قۇرالداردىڭ كومەگىمەن 400 گە جۋىق انالىق باستى ەكى ساعاتتا ساۋىپ شىعادى.
رايگۇل نۇرىمبەتوۆا، «قازىنا جەر» ج ش س ساۋىنشىسى:
- العاشقىدا ءبارىن ءۇش مەزگىل قولمەن ساۋدىق. ءارى بۇزاۋشى، ءارى ساۋىنشى بولىپ جۇمىس ىستەدىم. اپپاراتقا دا ءبىراز ۇيرەنە الماي ءجۇردى. بىرتىندەپ ۇيرەتتىك . قازىر تولىق ۇيرەندى. اپپارات ساۋىپ بولعان سوڭ، ءوزى ءتۇسىپ قالادى.
سەرىكتەستىك جۋىق ارادا شەتەلدەن تاعى 400 باس قارا الا سيىر اكەلمەك. ولار تۇراتىن ارنايى قورا سالىنىپ جاتىر. شارۋاشىلىقتىڭ تاعى ءبىر ەرەكشەلىگى مالعا قاجەتتى جەم- ءشوپتى وزدەرى ەگىپ الادى. سۋارمالى جەر دە بەرىلگەن. مەملەكەت قولداۋىنىڭ ارقاسىندا اياقتان تۇرىپ كەلە جاتقان فەرمەرلەردىڭ ونىمىنە دەگەن سۇرانىس تا ارتىپ كەلەدى.
24.kz