قازاق جازۋشىسى ءومىر بويى، اي سايىن 500 دوللار سىياقى الاتىن بولدى

استانا. قازاقپارات - «Mecenat.kz» ادەبي بايقاۋى ەكىنشى ماۋسىمىنىڭ جەڭىمپازى انىقتالدى. وتكەن جىلدىڭ قىركۇيەگىنەن بيىلعى مامىرعا دەيىن 103 ادام تىركەلىپ، 58 رومان جۇكتەلگەن.

ونىڭ ىشىندە قازاق تىلىندە جازىلعان ق ح ر ەلىنەن قاتىسقان ءبىر رومان بار، دەپ حابارلايدى قازاقپارات.

ۇيىمداستىرۋشىلاردىڭ اتاپ وتۋىنشە، بيىل بايقاۋعا ۇسىنىلعان تۋىندىلاردىڭ ساپاسى ءبىرشاما جاقسارعان، تەحنيكالىق تالاپتارعا قاتىستى ءتارتىپ بۇزۋشىلىق ايتارلىقتاي ازايعان.

كاسىبي فيلولوگ - ريدەرلەر ءار شىعارمانى تولىقتاي وقىپ شىعىپ، 5 بالدىق جۇيەمەن باعا بەردى. بۇل - العاشقى ىرىكتەۋ. ەكىنشى ىرىكتەۋگە تانىمال جازۋشىلار الىشەر راحات پەن يليا ودەگوۆ سۋپەرريدەر رەتىندە قاتىسىپ، قازاق تىلىندەگى 8 رومان، ورىس تىلىندەگى 5 روماندى وقىپ، ساراپتاپ شىقتى. ناتيجەسىندە ءۇش قازاق تىلىندە، ءۇش ورىس تىلىندە رومان ىرىكتەلىپ الىندى.

ريدەرلەر مەن سۋپەرريدەرلەردىڭ ىرىكتەۋ جۇمىسىنا ەشكىم ارالاسقان جوق، ۇيىمداستىرۋشىلار تولىقتاي انونيمدىلىك ساقتاپ، قاعازعا شىعارىلعان تۋىندىلاردى وقۋعا دايىنداپ بەرگەن.

سونىمەن، مىنا شىعارمالار وقىرمانعا داۋىس بەرۋگە ۇسىنىلدى:

1) «ولگەندەر قايتىپ كەلەدى»، اۆتورى تۇرىسبەك ساۋكەتايەۆ

2) «ۇزىلمە، ءۇمىت»، اۆتورى گۇلسارا داۋلەت قىزى رايىمقۇلوۆا

3) «تاۋ اسقاندار»، اۆتورى عاني تۇرىكمەنباي ۇلى جاقسىبايەۆ

4) «ي دۆا بوكالا نا ستولە»، اۆتورى جانگۇل امانگەلدى قىزى بايداۋلەتوۆا

5) «ۆ وجيدانيي كايروسا»، اۆتورى كەمەن قۇدايبەرگەن قىزى بايجاراسوۆا

6) «پەتروكوك»، اۆتورى مۇرات يسليام ۇلى ۋۆاليەۆ

ال، وقىرماندار ەڭ ۇزدىك دەگەن رومانعا 29-مامىر مەن 31-ماۋسىم ارالىعىندا سايت ارقىلى داۋىس بەردى. داۋىس بەرۋدە قانداي دا ءبىر قۇيتىرقى ارەكەتتەردىڭ الدىنا الۋ ءۇشىن ۇيىمداستىرۋشىلار ەكىنشى كەزەڭدە تەك قازاقستاندىق ۇيالى تەلەفون ءنومىرى ارقىلى داۋىس بەرىپ، وقىلعان رومان تۋرالى ءوز پىكىرىن قالدىرۋ تالابىن قوستى. وقىرمان شىعارما تۋرالى بوس ورىندى ەسەپكە الماعاندا 300 بەن 500 سيمۆول ارالىعىندا پىكىر قالدىرۋى كەرەك. بۇل پىكىرلەر مودەراتوردىڭ تەكسەرۋىنەن ءوتىپ، جالعان داۋىس جيناۋ، ادامنىڭ ار-نامىسىنا تيەتىن سوزدەر مەن ماعىناسىز پىكىرلەر الىنىپ تاستالدى. ودان كەيىن شىلدە ايىندا ارنايى تەكسەرۋ توبى ءار تىركەلگەن نومىرگە حابارلاسىپ، تەك شىنايى داۋىستار عانا ەسەپكە الىندى.

قوڭىراۋ شالىپ، داۋىس بەرۋشىلەردى تەكسەرۋ ناتيجەسى مىناداي:

1. «تاۋ اسقاندار»، اۆتورى عاني تۇرىكمەنباي ۇلى جاقسىبايەۆ

ءوزىنىڭ داۋىس بەرگەنىن راستاعان وقىرماندار سانى: 407

داۋىس بەرگەنىن راستاماعان وقىرماندار سانى: 311

حابارلاسۋ مۇمكىن بولماعان وقىرماندار سانى: 448

2. «ولگەندەر قايتىپ كەلەدى»، اۆتورى تۇرىسبەك ساۋكەتايەۆ

ءوزىنىڭ داۋىس بەرگەنىن راستاعان وقىرماندار سانى: 194

داۋىس بەرگەنىن راستاماعان وقىرماندار سانى: 252

حابارلاسۋ مۇمكىن بولماعان وقىرماندار سانى: 373

3. «ۇزىلمە، ءۇمىت»، اۆتورى گۇلسارا داۋلەت قىزى رايىمقۇلوۆا

ءوزىنىڭ داۋىس بەرگەنىن راستاعان وقىرماندار سانى: 79

داۋىس بەرگەنىن راستاماعان وقىرماندار سانى: 38

حابارلاسۋ مۇمكىن بولماعان وقىرماندار سانى: 82

تەلەفونمەن حابارلاسىپ، تەكسەرۋ جۇمىسى تولىقتاي ۆيدەوعا تۇسىرىلگەن جانە قازاقستاندا تىركەلگەن كەز كەلگەن جازۋشىلار ۇيىمىنا تەكسەرۋگە بەرۋگە مۇمكىندىك بار.

تەكسەرۋ ناتيجەسىندە عاني تۇرىكمەنباي ۇلى جاقسىبايەۆتىڭ «تاۋ اسقاندار» رومانى بايقاۋ تالاپتارىنا ساي ەمەس ەكەنى انىقتالدى. «تاۋ اسقاندار» رومانىنىڭ كولەمى - 65 بەت، ال تالاپ بويىنشا رومان 80 بەتتەن جوعارى بولۋى ءتيىس جانە وقيعا قازاقستان جەرىندە بولۋى كەرەك. ادەبي سىيلىقتىڭ نەگىزىن قالاۋشى ەرلان اسقاربەكوۆتىڭ قاتەلەسىپ كەتكەنىنە بايلانىستى، 12 كەگلمەن قاعازعا باسىلىپ شىعۋى ءتيىس رومان 14 كەگلمەن باسىلىپ شىققان. سول ءۇشىن دە ريدەرلەرگە وقۋعا ۇسىنىلعان. سوندىقتان دا، بۇل روماندى بايقاۋدان شىعارۋعا تۋرا كەلدى.

ايتا كەتسەك، «Mecenat.kz» ادەبي بايقاۋىنىڭ ەرەجەسى مىنا جەردە جاريالانعان.

الداعى ۋاقىتتا مۇنداي ورەسكەل قاتەلىكتەرگە جول بەرمەۋ ءۇشىن «ەرەجەگە» مىناداي وزگەرىستەر ەنەدى: روماننىڭ كولەمى بوس ورىندى ەسەپتەمەگەندە 150000 مەن 300000 سيمۆول بولۋى كەرەك.

ال، وقىرمانداردىڭ داۋىس بەرۋ ناتيجەسىندە تۇرىسبەك ساۋكەتايەۆتىڭ «ولگەندەر قايتىپ كەلەدى» رومانى جەڭىسكە جەتتى. ەندى ول «Mecenat.kz» ادەبي بايقاۋىنىڭ Ⅱ ماۋسىمىنىڭ جەڭىمپازى رەتىندە ءومىر بويى اي سايىن 500 دوللار سىياقى الىپ وتىرادى.

«Mecenat.kz» جوباسىنىڭ ماقساتى - قازاقستاندىق كوركەم ادەبيەتتى دامىتۋ جانە كىتاپ وقىرماندارىنىڭ ىنتاسىن ارتتىرۋ، جازۋشىلاردىڭ كاسىبي دەڭگەيىن كوتەرۋ جانە ولاردىڭ شىعارمالارىن الەمدىك كىتاپ نارىعىنا شىعارۋ. مۇنداي فورماتتاعى سىياقى الەمنىڭ ەش جەرىندە جوق. جوبانىڭ مەتسەناتى - بەلگىلى قازاقستاندىق قارجىگەر جانە فيلانتروپ تيمۋر رۋسلان ۇلى تۋرلوۆ.

بايقاۋدىڭ ءۇشىنشى ماۋسىمى 1-قىركۇيەكتە باستالادى. قولجازبالاردى قابىلداۋ 2024 -جىلعى 14-ساۋىردە كەشكىسىن توقتاتىلادى.

ەسكە سالساق، شىعارماشىلىق ادامدارىنا ارنالعان «مەتسەنات» سىيلىقاقىسى بىلتىر پايدا بولدى. ونىڭ يەگەرى اي سايىن ءومىرىنىڭ اياعىنا دەيىن 500 دوللار كولەمىندە تولەم الىپ وتىرادى. سىياقىنىڭ نەگىزىن قالاۋشى ەرلان اسقاربەكوۆ قازاقپارات تىلشىسىنە بەرگەن سۇحباتىندا مۇنداي سىيلىق تاۋەلسىز قازاقستان تاريحىندا تۇڭعىش رەت وتكىزىلىپ وتىرعانىن ايتتى.