تۇركىستاندىق 500 گە جۋىق وتباسى سولتۇستىككە كوشەدى
بۇل تۋرالى تۇركىستان وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى نۇرجان نۇراشوۆ مالىمدەدى، دەپ حابارلايدى قازاقپارات ءتىلشىسى.
ءساۋىر ايىنىڭ 19-21 كۇندەرى تۇركىستان وبلىسىنان سولتۇستىك وڭىرلەرگە «قونىس اۋدارۋ» جارمەڭكەسى ءوتتى. ماقتاارال اۋدانىندا باستالعان جارمەڭكە، سايرام اۋدانىندا جالعاسىپ، تۇركىستان قالاسىندا قورىتىندىلاندى.
پاۆلودار، شىعىس قازاقستان، سولتۇستىك قازاقستان، اباي وبلىستارىنان ارنايى كەلگەن 76 مامان سارىاعاش، كەلەس، سايرام، ورداباسى اۋداندارىن ارالاپ، ءار سالا بويىنشا بوس جۇمىس ورىندارىن ۇسىندى.
«3 كۇننىڭ ىشىندە 500 وتباسى، مۇشەلەرىن قوسا ەسەپتەگەندە 2000 عا جۋىق تۇركىستاندىق تەرىسكەيگە كوشۋگە نيەت ءبىلدىرىپ وتىر. جالپى «قۋاتتى وڭىرلەر - ەل دامۋىنىڭ درايۆەرى» جوباسى اياسىندا 2015 -جىلدان بەرى تۇركىستان وبلىسىنان ەلىمىزدىڭ جۇمىس كۇشى جەتىسپەيتىن سولتۇستىك وڭىرلەرگە حالىقتى قونىستاندىرۋ جۇمىستارى جۇرگىزىلىپ جاتىر. ناتيجەسىندە، 2015-2022 -جىلدار ارالىعىندا وبلىستان 12000 جۋىق ادام قونىس اۋدارعان» - دەدى نۇرجان نۇراشوۆ.
بۇل باعىتتا بيىل دا رەسپۋبليكا بويىنشا 6727 كۆوتا ءبولىنىپ وتىر. قونىس اۋدارۋشىلار ءۇشىن مەملەكەتتىك قولداۋ كورسەتەتىن اباي، اقمولا، قاراعاندى، قوستاناي، پاۆلودار، سولتۇستىك قازاقستان، ۇلىتاۋ، شىعىس قازاقستان وبلىستارى بەلگىلەنگەن. بولىنگەن كۆوتا نەگىزىندە، جىل باسىنان بەرى تۇركىستان وبلىسىنان 34 وتباسى قونىس اۋدارعان.