قوستاناي وبلىسىندا 500 دومبىراشى ءبىر مەزەتتە كۇي وينادى

امانگەلدى اۋدانى. قازاقپارات - امانگەلدى اۋدانىندا «اينالدىم سەنەن، اتامەكەنىم» اتتى وبلىستىق قىزعالداقتار فەستيۆالى باستالدى، دەپ حابارلايدى قازاقپارات.

اۋقىمدى شاراعا وبلىستىق باسقارما باسشىلارى، وزگە وبلىستاردىڭ دەلەگاتتارى، ونەر قايراتكەرلەرى قاتىستى. قىزعالداقتار فەستيۆالىنىڭ باستى جاڭالىعى - اۋداندا تۇڭعىش رەت 500 دومبىراشىنىڭ قاتىسۋىمەن كۇي وينالدى. مۇنى بەلگىلى ديريجەر، اۋداننىڭ قۇرمەتتى ازاماتى ساپار احمەتجانوۆ ۇيىمداستىردى.

«دايىندىق جۇمىستارى بىرنەشە كۇن بويى ءجۇردى. قاتىسۋشىلار ءار اۋىلدان كەلدى. ەندى ۇلتتىق دومبىرا كۇنى مەرەكەسىنە مىڭ دومبىراشىنىڭ قاتىسۋىمەن كونسەرتتىك باعدارلاما ۇسىنباقپىز. بۇل امانكەلدى اۋدانى اكىمىنىڭ جوباسى. وسىنداي رۋحاني ءىس شارالار ارقىلى جاس ۇرپاق ۇلتتىق قۇندىلىقتاردى سىڭىرە الادى»، - دەيدى ساپار احمەتجانوۆ.

 

ءىس-شارانىڭ تۇستەن كەيىنگى باعدارلاماسىندا اقىندار ايتىسى، ۇلتتىق ات سپورتى ويىندارى مەن قىزعالداق تۇرىندەگى كيىمدەر سايىسى جوسپارلانعان.